Тайланд астанасы Бангкокта 48 сағатқа созылған нөсерден кейін көшелерді су басып, төтенше жағдай жарияланды. Тұрғындарға үйде қалуға кеңес беріліп, қаланың каналдар жүйесіне жақын жерде тұратындарға заттарын жоғарғы қабатқа көшіру ұсынылды, деп хабарлайды infohub.kz сайты.
Тайландта жылдың осы мезгілінде найзағайлы жауын-шашын жиі болады. Алайда соңғы күндердегі төтенше ауа райы Бангкоктың су бұру жүйесін әбден титықтатып, кептелісімен әйгілі жолдарда көлік қозғалысын бұзды. Жауын сенбіге дейін жалғасады деп күтілуде, бұл тағы да бірнеше каналдың жағасынан асып кету қаупін тудырып отыр.
Орталық Бангкоктан солтүстікке қарай канал жағасында тұратын 67 жастағы Сомкид Пхеук-нгам Франс-Пресс агенттігіне былай деді: «Су үздіксіз келіп жатыр. Қазір сыртқа шығу қиын. Белімнің деңгейіне жетті. Ешқайда бара алмаймын. Дүкенімді екі күннен бері жауып қойдым».
Оның айтуынша, қаладағы су деңгейі 2011 жылғы жағдайдан да нашар көрінеді. Сол жылы Бангкокты бүкіл елді қамтыған үш айға созылған төтенше ауа райы оқиғасы әбден әлсіреткен еді. Тайландта сол кезде жүздеген адам қаза тапқан. Алайда қазіргі тасқыннан Бангкокта әзірге қаза болғандар тіркелген жоқ.
Тайланд метеорологиялық қызметі апта бойы тағы да қатты жауын жауатынын болжап отыр. Соңғы күндердегі нөсерді тудырған төмен қысым аймағы Тайландтың орталығына қарай жылжиды деп күтілуде.
Бангкоктың барлық 50 ауданы төтенше аймақ деп жарияланды.
Франс-Пресс агенттігінің хабарлауынша, қала әкімі Чадчарт Ситтипунт қаланың шығыс бөлігі ең қатты зардап шеккенін айтты.
«Жауын тоқтамай тұр, біз қолдан келгеннің бәрін жасап жатырмыз. Суды сорғызып шығаруға тырысып жатырмыз, бірақ каналдардағы су лық толы... Қауіпті аймақтар — канал жағасында тұратындар. Қазір барлық канал толы», — деді ол.