Бангладеште наурыз айынан бері ел тарихындағы ең ауқымды қызылша індеті жалғасып жатыр: ауруға байланысты қаза тапқандар саны 999-ға жетті, деп хабарлайды infohub.kz сайты.
Бангладеш Денсаулық сақтау министрлігінің дерегінше, 2026 жылғы наурызда індет басталғаннан бері 166 мыңнан астам күдікті қызылша жағдайы тіркелген, оның 19 835-і зертханалық жолмен расталған. Ауруға байланысты 999 өлім жағдайы бар, оның 100-і тікелей қызылшадан қаза тапқандар ретінде расталды. 146 мыңнан астам адам ауруханаға жатқызылды.
Reuters агенттігінің мәліметінше, індет вакцинациядағы олқылықтарға байланысты. 2024–2025 жылдардағы саяси дағдарыс аясында елде жоспарлы егу бағдарламалары кейінге шегеріліп, вакцина жеткізуде қиындықтар туындаған. Екпе алмаған балалар, әсіресе егуге әлі жарамсыз тоғыз айға толмаған нәрестелер ерекше осал болып шықты.
Бұған дейін Бангладеш инфекциямен күресте айтарлықтай жетістікке жеткен еді. Соңғы онжылдықтың басым бөлігінде елде қызылшаға қарсы егумен қамту кемінде 95%-ды құрады — Дүниежүзілік денсаулық сақтау ұйымы аурудың таралуын болдырмау үшін қажет деп санайтын деңгей. Алайда COVID-19 пандемиясы кезінде көрсеткіштер төмендеп, кейін иммундауда жаңа олқылықтар пайда болды.
Сәуірде билік қызылша мен қызамыққа қарсы шұғыл егу науқанын бастады, ол алты айдан бес жасқа дейінгі шамамен 18 млн балаға арналған. Кейін 19,7 млн-нан астам бала екпе алды.
Ахуалды денге безгегінің бір мезгілде өсуі қиындатып отыр. Биыл Бангладеште денгемен 45 мыңнан астам науқас ауруханаға жатқызылды. 9 қыркүйекте тәулік ішінде жатқызылғандар саны 1 571-ге, ал тіркелген өлім саны тоғызға жетіп, жыл басынан бергі ең жоғары көрсеткіш болды.
Даккадағы 1 350 науқасқа арналған мемлекеттік ауруханалардың бірінде қазір 2 350-ден астам адам жатыр. Қызылшамен ауырғандарға 60 төсек бөлінген, алайда кейбір науқастарды еденге жатқызуға тура келеді.
Қызылша — ең жұқпалы инфекциялардың бірі. Ол әдетте жоғары температура мен тән бөртпе тудырады, бірақ ауыр асқынуларға әкелуі мүмкін. Қызылшадан сенімді қорғану үшін вакцинаның екі дозасы қажет.
Бұған дейін Kursiv Health АҚШ-та рекордтық індет аясында қызылшадан алғашқы өлім жағдайлары тіркелгенін хабарлаған еді.