Қазақстан Ұлттық банкінің Банкнот фабрикасының таза пайдасы 2025 жылдың қорытындысы бойынша 27%-ға азайып, 4,36 млрд теңгені құрады. Бір жыл бұрын бұл көрсеткіш 5,97 млрд теңге болған еді, деп хабарлайды infohub.kz.
Кәсіпорынның қаржылық есептілігіне сәйкес, фабриканың жылдық кірісі 23,96 млрд теңгеден 22,45 млрд теңгеге дейін азайды. Негізгі кіріс көзі — Ұлттық банк үшін банкнот шығару. Банкнот өнімдерін сатудан түскен кіріс 15,18 млрд теңгеден 12,33 млрд теңгеге дейін төмендеді. Бұл 2025 жылы фабриканың жалпы кірісінің шамамен 55%-ын құрады.
Сонымен қатар, банкнотқа жатпайтын басқа өнімдерді сату көлемі өсті. Өзге өнімдерді сатудан түскен кіріс 8,77 млрд теңгеден 10,11 млрд теңгеге дейін артты. Жалпы кірістің төмендеуіне қарамастан, өткізілген өнімнің өзіндік құны анағұрлым қатты қысқарды — 17,97 млрд теңгеден 17,21 млрд теңгеге дейін. Алайда бұл пайданың бұрынғы деңгейін сақтап қалуға жеткіліксіз болды: кәсіпорынның жалпы пайдасы 5,99 млрд теңгеден 5,24 млрд теңгеге дейін азайды.
Әкімшілік шығындар мен табыс салығы бойынша шығыстардың өсуі қаржылық нәтижеге қосымша қысым көрсетті. Нәтижесінде фабриканың жылдық таза пайдасы 1,6 млрд теңгеден астамға төмендеді.
Банкнот фабрикасы — Ұлттық банк құрылымына кіретін мамандандырылған кәсіпорын. Теңге дайындаудан бөлек, ол бағалы қағаздар, чек кітапшалары, акциздік маркалар, жеке куәліктер, паспорттар, әскери билеттер, дипломдар, аттестаттар, сақтандыру полисі және басқа да қорғалған полиграфиялық өнімдерді шығарады. Кәсіпорын сондай-ақ төлем карточкаларын, қатаң есептілік бланкілері мен баспа пластиналарын өндіреді.
2025 жылдың соңындағы жағдай бойынша Банкнот фабрикасының жарғылық капиталы 13,08 млрд теңгені құрады. Кәсіпорынның жалғыз құрылтайшысы және мемлекеттік басқару органы — Қазақстан Ұлттық банкі.
Бұған дейін Қазақстанда ақша массасы қайта өсіп жатқаны хабарланған болатын: бизнес ақшаны депозиттерге қайтарған.