Қазақстанда автокөлік отынының құны Еуразиялық экономикалық одақ елдері арасында ең төмен болып қалуда, дегенмен соңғы бір жылда бензин 15,6%-ға қымбаттады, деп хабарлайды infohub.kz.
Еуразиялық экономикалық комиссияның (ЕЭК) деректеріне сәйкес, биылғы маусымда республикада бензин бағасы былтырғы сәйкес кезеңмен салыстырғанда орта есеппен 15,6%-ға, ал дизель отыны 10,6%-ға қымбаттаған. Ал ЕАЭО-ның басқа елдерінде өсім одан да жоғары болған. Мәселен, Ресейде бензин 19,9%-ға, Қырғызстанда 17,7%-ға қымбаттаса, дизель тиісінше 18,1% және 26,4%-ға қымбаттаған.
Ең аз өсім Беларусьте тіркелген: онда бензин мен дизель бір жыл ішінде небәрі 3,1%-ға қымбаттаған. Арменияда бензин 18,4%-ға, дизель 19%-ға қымбаттаған.
Қымбаттауға қарамастан, Қазақстан ЕАЭО елдері арасында отынның қолжетімділігі бойынша көшбасшылығын сақтап отыр. Дизельдің бір литрі орта есеппен 336 теңге тұрады (маусымдағы бағам бойынша 0,69 доллар), ал Беларусьте — 468 теңге (0,96 доллар), Қырғызстанда — 521 теңге (1,07 доллар), Ресейде — 560 теңге (1,15 доллар), Арменияда — 755 теңге (1,55 доллар).
Бензинде де жағдай ұқсас: Қазақстанда бір литр орта есеппен 240 теңге тұрады. Салыстыру үшін, Беларусьте баға 458 теңге (0,94 доллар), Қырғызстанда — 468 теңге (0,96 доллар), Ресейде — 477 теңге (0,98 доллар), Арменияда — 711 теңге (1,46 доллар) құрайды.
ЕЭК сонымен қатар маусымда Қазақстанда бензиннің тұтыну бағасы өндірушілердің орташа бағасынан 1,6 есе жоғары болғанын атап өтті. Беларусьте бұл көрсеткіш 1,5 есе, Ресейде — 2,3 есе, ал Қырғызстанда — 49,1% құрады.
Бұған дейін Қазақстан әлемдегі ең арзан бензин бар елдер тізіміне енген болатын. Алайда арзан бағаның кері жағы да бар: көрші мемлекеттерге арзан отынды заңсыз шығару жағдайлары тіркелуде.