Англияның «Бернли» футбол клубы бас бапкер қызметіне 50 жастағы швейцариялық маман Фабио Челестиниді тағайындағанын хабарлады. Лондонның «Челсиінен» жалға алынған Қазақстан құрамасының шабуылшысы Дәстан Сатпаев осы клубта доп тебеді, деп жазады infohub.kz сайты.
Жаңа бапкермен жасалған келісімшарттың мерзімі ресми түрде жарияланбады. Челестини «Бернли» тізгініндегі алғашқы ойынын 31 қазанда өткізеді: Чемпионшиптің 13-туры аясында команда «Портсмутты» қабылдайды.
«Мен „Бернлиге“ қарап, үлкен әлеуеті бар және барша жанкүйердің арманын жүзеге асыруға қабілетті, шынымен сапалы ойыншылары бар клубты көремін. Мен қандай жағдайда тұрғанымызды білемін және бұған дейін де осындай жағдайға тап болғанмын. Жанкүйерлеріміз команданың алғашқы ысқырықтан бастап өз күшіне сеніммен ойнағанын көруге лайық», — деді Челестини.
Маманның соңғы жұмыс орны Мәскеудің ЦСКА клубы болды, онымен ол Ресей Суперкубогын жеңіп алды. Бұл командадан Челестини 2026 жылдың мамырында кетті. «Базельмен» бірге бапкер Швейцария чемпионаты мен Кубогын ұтып алды. Тағы бір Швейцария Кубогын ол «Люцерн» клубын басқарып жүріп иеленді.
Челестини «Бернлиде» бельгиялық Ники Хайенді алмастырады. Ол кезде «қызыл-қоңырлар» Чемпионшиптің 12 турында тек бір ғана жеңіске жеткен. Сегіз ұпайы бар команда 22-орында тұрып, төменгі лигаға түсу аймағында қалды.
«Бернлиде» лондонның «Челсиінен» жалға алынған Дәстан Сатпаев ойнайды. Ағымдағы маусымда Қазақстан құрамасының шабуылшысы әзірге нәтижелі әрекеттермен көзге түскен жоқ.