Астрофизиктер алғаш рет Күн жүйесінен тыс планетадан келген радиосигналды тіркеді. Сигнал көзі Жерден 64 жарық жылы қашықтықта орналасқан, деп хабарлайды infohub.kz сайты.
Ашылымды Оңтүстік Африкада орнатылған MeerKAT радиотелескопының көмегімен американдық ғалымдар тобы жасады. Қабылданған сигнал — қайталанып келетін радиожарылыстар. Оларды Beta Pictoris b экзопланетасымен байланыстыруға мүмкіндік туды.
Бұл планета — жас газ гиганты, массасы Юпитерден шамамен 12 есе ауыр. Ол Beta Pictoris жұлдызының айналасында айналады және Жерден шамамен 64 жарық жылы қашықтықта. Бір жарық жылы — шамамен 9,5 трлн километр, сондықтан сигнал бізге бірнеше ондаған жыл бойы жетіп келген.
Алайда бұл — өзге өркениеттің хабарламасы емес. Зерттеушілердің пікірінше, радиожарылыстар полярлық шұғылалардан туындаған: планетадағы бөлшектер оның магнит өрісінің сызықтары бойымен қозғалып, атмосферадағы газбен соқтығысады. Соның нәтижесінде Күн жүйесіндегі планеталардағы полярлық шұғылалармен ұқсас радиотолқындар пайда болады.
Дәл осы сигнал ғалымдарға экзопланетаның магнит өрісін алғаш рет тікелей бағалауға мүмкіндік берді. Ол кемінде 1 250 гаусс — Юпитердің магнит өрісінен шамамен 290 есе, ал Жердікінен шамамен 2 500 есе күшті.
Бұған дейін Kursiv LifeStyle неміс стартапы Isar Aerospace Spectrum зымыранын сәтті ұшырғанын хабарлаған. Ұшыру Норвегиядағы Аннёйа ғарыш айлағынан жүзеге асты. Бұл зымыранның екінші сынақ ұшуы еді.