BI Group холдингінің еншілес құрылымы — BI Development құрылыс компаниясы қазақстандықтарға жылдық мөлшерлемесі 7,75%-ға дейінгі долларлық облигацияларға инвестиция салуды ұсынды, деп хабарлайды infohub.kz сайты.
Қазақстан қор биржасында (KASE) компания жалпы көлемі $9 млн болатын екі және үш жылдық долларлық облигациялардың екі шығарылымын орналастырады. Бағалы қағаздар $15 млн көлеміндегі листингтік шығарылымдар санатына енеді. Бір қағаздың номиналдық құны небәрі $100 болады.
Бірінші шығарылым — 2028 жылдың 29 қыркүйегіне дейін, жылдық мөлшерлемесі 7,5%, сомасы $7 млн. Ол бойынша сыйақы жылына екі рет төленеді, ал бір қағаздың номиналы $100 құрайды.
Екінші шығарылым — 2029 жылға дейін. Үш жылдық облигациялар бойынша мөлшерлеме 7,75% деп бағаланып отыр, көлемі — $2 млн. Бір қағаздың құны да $100 болады.
Түпкілікті купон, яғни облигациялар бойынша сыйақы инвесторлардың өтінімдері бойынша сауда-саттық барысында айқындалады. Орналастыру 29 қыркүйекте өтеді, облигацияларды брокер арқылы сатып алуға болады.
Салыстыру үшін: жеке тұлғаларға арналған валюталық депозиттер бойынша ең жоғары мөлшерлеме 1% құрайды. 1 қазаннан бастап кейбір салым түрлері бойынша ол жылдық 2,5%-ға дейін өседі.
Қазақстандағы долларлық облигациялар бойынша нарықтық мөлшерлемелер эмитенттің сенімділігі мен алаңына қарай жылдық 6%-дан 11%-ға дейін. Алайда орналастыру кезіндегі қағаздың ең төменгі құны, әдетте, $100-ден жоғары, және мұндай облигациялар тек кәсіби инвесторларға қолжетімді.
Тұрғын және коммерциялық жылжымайтын мүліктің ірі құрылыс компаниясы BI Development BI Group холдингінің құрамына кіреді. Оның мажоритарлық акционері — бизнесмен Айдын Рахимбаев, оның байлығын Forbes $1,1 млрд деп бағалайды. Басылым оны қазақстандық ең бай бизнесмендер тізімінде тоғызыншы орынға қояды.
Бұған дейін Freedom Finance компаниясы AIX биржасында мөлшерлемесі 8,5% болатын үш жылдық долларлық облигацияларды орналастырған.