Қазақстанда білім беру жобаларының конкурсына өтінім қабылдау басталды. Үздік бастамалардың авторлары өз шешімдерін дамыту мен ауқымдау үшін 10 млн теңгеге дейін грант ала алады, деп хабарлайды infohub.kz.
Өтінімді 2026 жылғы 30 шілдеден 31 тамызға дейін беруге болады. Конкурс қорытындысы бойынша бес пен жеті жобаға дейін қолдау көрсету жоспарлануда, олардың әрқайсысы 10 млн теңгеге дейін ала алады. Жеңімпаздар 10 қыркүйекте жарияланады.
Конкурс білім саласындағы қазірдің өзінде жұмыс істеп тұрған жобаларға арналған. Ұйымдастырушылардың айтуынша, бастамалардың алғашқы нәтижелері, аяқталған пилоттық кезеңі немесе дайын өнімі болуы керек. Тек идея деңгейіндегі жобалар конкурсқа жіберілмейді.
«Өзгерістер мәселенің өздігінен шешілуін күтпейтін адамдардан басталады. Біз дәл осындай командаларды – жұмыс істеп тұрған шешімдері, батыл идеялары және жүйелі жұмыс істеуге дайындығы бар командаларды қолдағымыз келеді. Егер сіздің жобаңыз мектеп оқушыларына, студенттерге немесе оқытушыларға көмектесіп жатса және оны қалай күшейтуге болатынын түсінсеңіз, біз сіздің өтініміңізді асыға күтеміз», — деді EA Charity fund директоры Айдар Бұрыбаев.
Өтінімді Қазақстанда білім беру бастамаларын жүзеге асыратын 21 жастан асқан жеке және заңды тұлғалар бере алады. Әлеуетті қатысушылардың қатарында: білім беру стартаптары, қосымша, кәсіптік бағдарлау және инклюзивті оқыту орталықтары, оқытушылар мен студенттер.
Басымдық сапалы білімнің қолжетімділігін арттыруға, оқу үдерісіне жаңа технологияларды енгізуге, педагогтарды қолдауға, инклюзивті білімді дамытуға және қауіпсіз білім беру ортасын құруға бағытталған жобаларға беріледі.
Өтінімдер қазақ және орыс тілдерінде Tamyr Platform сайты арқылы 31 тамызда сағат 23:59-ға дейін қабылданады. Қосымша ақпаратты платформаның сайтынан және әлеуметтік желілерінен алуға болады.