Бішкекте Қазақстанның қолдауымен Кемел Тоқаев атындағы №33 мектеп-гимназиясын жаңғырту жұмыстары жалғасып жатыр. Тарихи оқу орны жаңа инфрақұрылым мен заманауи жабдыққа қол жеткізіп, оқушыларға цифрлық технологиялар мен жаратылыстану ғылымдарын меңгеруге неғұрлым қолайлы жағдай жасалуда, деп хабарлайды infohub.kz сайты.
Жаңғыртудың бір кезеңі ретінде информатика, робототехника және химия кабинеттері ашылды. Оқу бөлмелері қазақстандық тарап ұсынған заманауи техникамен, зертханалық жабдықпен және жиһазбен жарақталды.
Информатика және жасанды интеллект технологиялары кабинетіне мектепке 25 компьютер, прототип жасауға арналған 3 принтер, 4 3D-сканер және диагоналі 75 дюймдік интерактивті монитор берілді. Сонымен қатар оқу орны пернетақталар, тінтуірлер, құлаққаптар және қажетті жиһазбен қамтамасыз етілді.
Информатика мұғалімі Асқат Бөріқұловтың айтуынша, жаңа компьютерлер қуатты аналық платалармен, заманауи бейнекарталармен және ұлғайтылған жедел жадымен жабдықталған. Бұл оқушыларға 3D-графикамен жұмыс істеуге, модельдеуді меңгеруге және оқу үдерісінде заманауи бағдарламаларды пайдалануға мүмкіндік береді.
Химияны практикалық оқытуды дамытуға ерекше көңіл бөлінді. Жаңа кабинет колбалармен, пробиркалармен, химиялық реагенттермен, оларды сақтауға арналған жабдықпен және тәжірибе жүргізуге арналған арнайы жиһазбен жарақталды.
Химия мұғалімі Альбина Усанованың айтуынша, жаңартылған зертхана оқушыларға зерттеулерді жиі жүргізуге, ғылыми жобаларға, конкурстар мен олимпиадаларға қатысуға, сондай-ақ химиялық реакцияларды практикада меңгеруге мүмкіндік береді.
Жабдықтың бір бөлігі әлі ашылмағанымен, жаңа кабинеттерде сабақтар басталып кетті. Информатика сабақтарында оқушылар цифрлық дағдыларды дамытып, робототехника мүмкіндіктерімен танысады, ал химия сабақтарында тәжірибе жасап, түрлі заттардың реакцияларын бақылайды.
Мектеп директоры Таалайкүл Ашымова Қазақстанға көрсеткен қолдауы үшін алғыс білдіріп, білім саласындағы ынтымақтастықтың маңыздылығын атап өтті.
«Жаңадан жабдықталған кабинеттермен бірге біз балаларымызға сапалы білім беру мүмкіндігіне қол жеткіздік. Достық ел — Қазақстан тарапынан қолдау бар екеніне шексіз қуаныштымыз. Бірлескен білім жобаларымыздың жалғасын асыға күтеміз», — деді ол.
Кемел Тоқаев атындағы мектепті жаңарту заманауи білім ортасын дамытуға, жаңа технологияларды енгізуге және оқыту сапасын арттыруға бағытталған. Қазақстанның қолдауы оқу орнының материалдық-техникалық базасын кеңейтіп, оқушыларды ақпараттық технологиялар, инженерия және жаратылыстану ғылымдары салаларында даярлауға қосымша мүмкіндіктер жасайды.