Қырғызстан астанасында «Мадина» базарында ірі өрт болды. Жалын шамамен 400 шаршы метр аумақты шалды, деп хабарлайды infohub.kz сайты.
Қырғыз басылымы 24.kg-дің мәліметінше, өртті сөндіруге қаладағы барлық өрт сөндіру машиналары жұмылдырылған. Қырғызстанның ТЖМ өкілдері оқиға орнында он өрт сөндіру есебі жұмыс істеп жатқанын нақтылады. Ахуалды бағалау және іс-қимылды үйлестіру үшін дрон да қолданылды. Сонымен қатар, базарға «Тазалық» муниципалдық кәсіпорнының үш су таситын машинасы мен үш жедел жәрдем бригадасы жіберілді.
Өрт 30 тамызда таңертең контейнерлердің бірінде басталып, кейін сауда павильондарына ауысқан. Бішкек қалалық ішкі істер басқармасының алдын ала болжамы бойынша, өрттің себебі электр сымдарының тұйықталуы болуы мүмкін.
Полицияның мәліметінше, зардап шеккендер жоқ. Өрт кезінде базар жұмыс істемеген: ол үш күнге жабылып, сатушылар мәжбүрлі демалысқа жіберілген.
Өрт оқшауланды. Құтқарушылар қалған жану ошақтарына жету үшін жабық контейнерлерді ашуды жалғастыруда.