Батыс Қазақстан облысында сот ата-анасы қаза тапқан баланың әжесіне өтемақы төлетті. Немере әкесі мен шешесінен айырылған соң әжейдің қамқорлығына берілген еді, деп хабарлайды infohub.kz.
Батыс Қазақстан облыстық сотының баспасөз қызметінің мәліметінше, өңір тұрғыны асыраушысының қайтыс болуынан келтірілген материалдық залал мен моральдық зиянды өтеуді, талап қоюға дейінгі үш жыл үшін біржолғы өтемақыны, сондай-ақ асыраушысынан айырылуға байланысты ай сайынғы төлемдерді тағайындауды сұрап, сотқа жүгінген.
Анықталғандай, 2014 жылы талапкердің ұлы жұмыс міндеттерін атқару кезінде өндірістік жарақат алып қаза тапқан. Осылайша отбасы асыраушысынан және негізгі табыс көзінен айырылған. 2022 жылы марқұмның әйелі қайтыс болып, талапкер кәмелетке толмаған немересінің қамқоршысы болған. Талапкердің айтуынша, ұлы қайтыс болған кезде ол зейнеткер болған, ал келіні қайтыс болған соң денсаулығы шектеулі (үшінші топ) немересіне қамқорлық жасау міндетін өз мойнына алған. Оның пікірінше, ол күтілетін өмір сүру ұзақтығы кезеңіне залалды өтеуге, ал кәмелетке толмаған немересі 18 жасқа толғанға дейін немесе еңбекке қабілеттілігін алғанға дейін өтемақы алуға құқылы. Сондай-ақ ол моральдық зиянды өтеуді сұраған, себебі бұрын отбасы кінәлілерден ешқандай төлем алмаған.
Дәлелдемелерді зерттеген сот талапты ішінара қанағаттандырды. Марқұмның асырауында кәмелетке толмаған ұлы мен анасы болғаны анықталды; анасы марқұмның әйелі қайтыс болған соң баланың жалғыз заңды өкілі болған. Жұмыс беруші мен екінші ұйымның кінәсі және олардың жауапкершілік дәрежесі заңды күшіне енген сот шешімімен белгіленген. Өтемақы мөлшерін айқындау кезінде марқұмның орташа айлық жалақысы және жұмыс берушінің бұрын әйеліне төлеген 5 млн теңге көлеміндегі өтемақысы ескерілген.
Нәтижесінде сот жұмыс берушіден талапкердің пайдасына: талап қоюға дейінгі үш жыл үшін біржолғы зиянды өтеу — 1,6 млн теңге; өмір бойы ай сайынғы төлемдер — 45 мың теңге; моральдық зиянды өтеу — 1,5 млн теңге өндірді. Кәмелетке толмаған баланың пайдасына: біржолғы зиянды өтеу — 1,6 млн теңге; 18 жасқа дейін ай сайынғы төлемдер — 32 мың теңге; моральдық зиянды өтеу — 1,5 млн теңге.
Екінші кінәлі ұйымнан талапкердің пайдасына: біржолғы зиянды өтеу — 980 мың теңге; өмір бойы ай сайынғы төлемдер — 27 мың теңге; моральдық зиянды өтеу — 1 млн теңге өндірілді. Баланың пайдасына: біржолғы зиянды өтеу — 980 мың теңге; 18 жасқа дейін ай сайынғы төлемдер — 27 мың теңге; моральдық зиянды өтеу — 1 млн теңге.
«Сот қабылдаған шешім әлеуметтік әділеттілікті қамтамасыз етуге, марқұм жұмысшының отбасы мүшелерінің бұзылған құқықтарын қалпына келтіруге, сондай-ақ денсаулығы шектеулі кәмелетке толмаған баланың және оның заңды өкілінің мүдделерін қорғауға бағытталған. Сот шешімі заңды күшіне енді», — деп хабарлады соттан.