Boeing компаниясының жаңартылған болжамы бойынша, алдағы 20 жылда әлемдік әуе нарығы 43 мыңнан астам жаңа әуе кемесін қажет етеді. Ирандағы соғыстан туындаған геосаяси шиеленіске қарамастан, американдық өндіруші коммерциялық әуе кемелеріне сұраныс болжамын өзгертпеді. Құжат Фарнборо әуе салоны қарсаңында жарияланды, деп хабарлайды infohub.kz сайты.
Болжам бойынша, 2026-2045 жылдар аралығында әлемдік әуе тасымалдаушыларға 43 625 жаңа әуе кемесі қажет болады. Оның 33 545-і – тар фюзеляжды лайнерлер, 7 715-і – кең фюзеляжды, 930-ы – жүк кемелері және 1 435-і – аймақтық ұшақтар. Еуропалық бәсекелес Airbus Таяу Шығыс қақтығысы мен сауда шиеленісіне байланысты жақында өз болжамын 1%-ға төмендетті. Boeing компаниясында қазіргі баяулауды уақытша деп санайды және әлемдік жолаушылар ағыны 2028 жылдың соңына қарай бұрын болжанған өсу траекториясына қайта оралады деп күтеді.
Компания жолаушылар әуе тасымалы жылына орта есеппен 4%, жүк тасымалы 3,7% өседі, ал әлемдік әуе кемелері паркі 2025 жылғы 28 мыңнан 2045 жылға қарай 50 мыңға дейін екі есеге жуық артады деп болжайды. Сонымен қатар, 2026 жылға қарай шамамен 2 мың әуе кемесі тапшылығы күтілуде. Тар фюзеляжды лайнерлердің жетіспеушілігі онжылдықтың соңына дейін, ал кең фюзеляждылардың тапшылығы 2030 жылдардың басына дейін сақталады.
Болашақ жеткізілімдердің жартысына жуығы ескірген әуе кемелерін ауыстыруға, қалған бөлігі паркті кеңейтуге кетеді. Ең ірі нарық Қытай болып қалады, оған барлық жеткізілімнің 21% тиесілі. Boeing компаниясының өзі 737 MAX 7, 737 MAX 10 және 777-9 модельдерінің өндірістік шектеулері мен сертификаттау кешігулеріне тап болып отыр, алайда компанияда сауда, туризм, көші-қон сияқты іргелі драйверлер ұзақ мерзімді сұранысты қамтамасыз етеді деген сенім бар.