Болгарияда астана Софияны Бургас қаласымен жалғайтын Тракия тас жолында екі ірі жол апаты болып, оған барлығы 86 көлік қатысты. Апат салдарынан 11 адам қаза тапты, деп хабарлайды infohub.kz сайты.
Елдің Ішкі істер министрлігі оқиғаның ең ықтимал себебі қою тұман деп мәлімдеді. Ведомство дерегінше, алғашқы соқтығыс Бургас бағытындағы жолақта болған: жүк көлігі жолаушылар автобусының жолын бөгеп тастаған. Автобустың артынан бидай тиеген жүк көлігі келе жатқан. Жеңіл көлік жүк көлігінің артқы бөлігіне соқтығысып, ол өз кезегінде автобусқа барып соғылған.
Екінші соқтығыс София бағытындағы жолақта болды. «Апаттар алдында көріну қашықтығы 70–80 метр болғаны анық. Тұман кенет қоюланып, Бургас жаққа қарай келе жатқан көліктер дереу кептеліс жасады. Қарсы жолақта апаттың ең ықтимал себебі — не болып жатқанын көру үшін жылдамдығын азайтқан жүргізушілердің көліктерін баяулатуы болды», — деді Болгарияның Ішкі істер министрі Иван Демерджиев.
Ішкі істер министрлігінің дерегінше, оқиғаға 86 көлік қатысқан, оның 63-і Бургас бағытында, 23-і София бағытында келе жатқан.
Елдің Денсаулық сақтау министрлігі он адам оқиға орнында қаза тапқанын, тағы біреуі ауруханада көз жұмғанын хабарлады.