Қазақстан Премьер-министрінің орынбасары Қанат Бозымбаев Каспий теңізіндегі қайғылы оқиғаға кінәлі барлық лауазымды тұлғалар жазаға тартылатынын мәлімдеді, деп хабарлайды infohub.kz сайты.
Қазақстан Республикасы Премьер-министрінің орынбасары Қанат Бозымбаевтың ресми мәлімдемесі Маңғыстау облысы әкімдігінің Telegram-арнасында жарияланды.
«Бүгін еліміз ауыр қазаға ұшырады. Маңғыстау облысындағы қайғылы оқиға салдарынан 12 әскери қызметшіміз қаза тапты, үшеуін аман алып қалу мүмкін болды, қалған екеуін іздеу жалғасуда. Мемлекет басшысы Қасым-Жомарт Кемелұлы Тоқаев қаза тапқан сарбаздар мен офицерлердің отбасыларына, туған-туыстарына терең әрі шынайы көңіл айтады. Президент пен бүкіл қазақ халқы сіздердің орны толмас қайғыларыңызды бөліседі», — деді Бозымбаев.
Ол болған оқиғаға байланысты уәкілетті органдар қылмыстық іс қозғағанын еске салды. Оның айтуынша, тергеу барынша мұқият, объективті және қысқа мерзімде жүргізіледі.
«Әрекеті немесе әрекетсіздігі осы қайғылы оқиғаға әкеп соққан барлық лауазымды тұлғалар заңның барлық қатаңдығымен жазаланады. Мемлекет қаза тапқандардың отбасыларын бұл қайғымен жалғыз қалдырмайды. Қаза тапқан әрбір әскери қызметшінің отбасына ірі көлемде материалдық көмек көрсетіліп, қажетті қолдаудың барлығы беріледі», — деп қосты Бозымбаев.
Премьер-министрдің орынбасары тергеу барысы мен отбасыларға көмек көрсету өзінің жеке бақылауында екенін де атап өтті.
Еске салайық, 24 қыркүйекте Маңғыстау облысында Қазақстан Республикасы Қарулы Күштерінің Әскери-теңіз күштерінің оқу-жаттығуы кезінде Каспий теңізінің жағалауында ауа райының күрт нашарлауы мен желдің күшеюі салдарынан әскери қызметшілер теңізге ағызылып кетті.
Алғашында теңізге 19 әскери қызметші ағызылып кеткені және 9 әскери қызметшінің қаза тапқаны бірден расталғаны хабарланды. Бас прокуратура Ақтау гарнизонында қылмыстық іс қозғалып, тергеліп жатқанын мәлімдеді.
Әскери қызметшілердің қаза табуынан кейін үкіметтік комиссия құрылып, төтенше оқиға орнына Премьер-министрдің орынбасары Қанат Бозымбаев жіберілді. Президент Қасым-Жомарт Тоқаев Маңғыстау облысында әскери қызметшілердің қаза табуына байланысты көңіл айтып, қайғылы оқиғаны тергеу жөнінде тапсырмалар берді.
Ақтауда Қала күніне орай мерекелік іс-шаралар тоқтатылды. Қасым-Жомарт Тоқаев 25 қыркүйекті Қазақстанда жалпыұлттық аза тұту күні деп жариялады.
24 қыркүйек кешінде Премьер-министрдің орынбасары Қанат Бозымбаевтың басшылығымен комиссия Маңғыстау облысына келді. Каспий теңізіндегі оқу-жаттығу кезінде қаза тапқандардың туыстары Ақтаудағы мәйітханаға денелерді тану үшін келді.
24 қыркүйек кешінде нақтыланған деректер белгілі болды: теңізге 17 адам ағызылып кетті, олардың 12-сі қаза тапты, үшеуін аман алып қалу мүмкін болды. Қалған екі әскери қызметшіні іздеу жалғасуда.
Сондай-ақ Қорғаныс министрлігі Каспий теңізіндегі оқу-жаттығу кезінде қаза тапқан әскерилердің тізімін жариялады. Тізімге 11 матрос және бір аға лейтенант енді.