Британдық зерттеушілер қарапайым несеп талдауы арқылы қуық қатерлі ісігін 99%-дан жоғары дәлдікпен анықтай алатын жаңа генетикалық тест әзірледі, деп хабарлайды infohub.kz сайты.
Қуық қатерлі ісігі әлемдегі ең көп таралған онкологиялық аурулардың ондығына кіреді. Аурудың басты белгісі — несепте қанның пайда болуы. Алайда стандартты тексеру ағзаға жұқа камера енгізуді талап ететін күрделі әрі жағымсыз процедураны қамтиды. Жайсыздық қаупінің жоғарылығы мен қабылдауға ұзақ күтуге байланысты көптеген науқас дәрігерге баруды кейінге қалдырады.
Британдық мамандардың жаңа әзірлемесі ауыртпалықсыз медициналық араласуларсыз-ақ ауруды ең ерте сатысында анықтауға мүмкіндік береді. Тест несеп үлгісінде ісік дамуына қатысы бар 23 геннің іздері мен ерекше ақуыздардың бар-жоғын тексереді.
Зерттеуге мыңға жуық науқас қатысты. Тест қауіпті патологиялардың жоқтығын жүз пайызға жуық жағдайда дұрыс анықтады, сондай-ақ 77 науқастың 71-інде ауруды тапты.
Әдістің басты артықшылығы — оның қолжетімділігі мен адамдар үшін қауіпсіздігі. Тексеруді басқа мақсаттарға тапсырылған несеп үлгілерінен де жүргізуге болады, бұл қауіп тобындағы науқастарда ісікті кездейсоқ анықтауға мүмкіндік береді. Дәрігерлер бұл технологияны енгізу мыңдаған адамды жағымсыз процедуралардан құтқарып, ауруханалардағы кезекті айтарлықтай қысқартады деп үміттенеді.