Лондон тұрғыны Колби Булл ұшу кезінде жеті коллекциялық карточка жинағын небәрі 60 секундта ашып, әлемдік рекорд орнатты, деп хабарлайды infohub.kz сайты.
Бұл жетістікті Гиннесс рекордтар кітабының сарапшылары тіркеді, деп жазады UPI агенттігі. Сирек кездесетін коллекциялық заттармен айналысатын Edition One компаниясының негізін қалаушы 13 қазанда Кент графтығындағы Хедкорн аэродромында осындай экстремалды тәжірибеге бел буды.
Ер адамды қауіпсіздік белдіктерімен бипланның үстіңгі қанатына мықтап байлап тастады. Ұшақ әуеге көтерілгенде, коллекционерге зор жылдамдықпен және қатты желде карточкаларды ашып, берілген бір минутқа үлгеру қажет болды.
Британиялықтың айтуынша, әр коллекционерге сирек жинақтарды ашқандағы толқу таныс, сондықтан ол адреналин толқынында осы сезімді бастан кешкісі келді. Ең қиыны — желдің күшті екпіні мен суық болды: ер адамның қолдары мұздай ауадан мүлдем қатайып, қарсы ағындар қаптамаларды саусақтарынан жұлып әкетті.
Экстремалды жағдай мен шектеулі уақытқа қарамастан, лондондық зейінін сақтап, қонуға дейін жеті жинақтың барлығын ашып үлгерді. Бейнежазбаны тексеріп, барлық шартты орындаған соң сарапшылар жетістікті жаңа әлемдік рекорд ретінде ресми тіркеді.