Солтүстік Қазақстан облысында «Булаев су» жауапкершілігі шектеулі серіктестігінің 51% үлесі мемлекет меншігіне қайтарылды. Бұл кәсіпорын Булаево қаласының тұрғындарын сумен жабдықтайды, деп хабарлайды infohub.kz сайты.
Қадағалау органының ресми сайтында жазылғандай, Мағжан Жұмабаев ауданының прокуратурасы тұрғын үй-коммуналдық шаруашылық және мемлекеттік мүлікті пайдалану саласындағы заңдылық жай-күйіне талдау жүргізген. Оның қорытындысы бойынша 2017 жылғы электрондық аукционның қорытындыларын және «Булаев су» ЖШС жарғылық капиталындағы 51% үлесті сатып алу-сату шартын жарамсыз деп тану туралы талап қою енгізілген.
Сотта прокурор «AUHAL» ЖШС «Булаев су» ЖШС-дегі 51% үлесті сатып алғанымен, іс жүзінде кәсіпорын жұмысына қатыспағанын және су құбыры желілерін ұстау мен дамытуға қаражат салмағанын дәлелдеді. Ал оларды ұстауға және апаттық-қалпына келтіру жұмыстарына кеткен негізгі шығындар іс жүзінде Мағжан Жұмабаев ауданы әкімдігінің бюджеті мен ресурстары есебінен өтелген.
«Нәтижесінде Булаево қаласының тұрғындарын сумен жабдықтайтын кәсіпорын күрделі қаржылық жағдайда қалды, ал оның тұрақты жұмысын қамтамасыз ету жүгі іс жүзінде мемлекетке артылды», — деп атап өтті Солтүстік Қазақстан облысының прокуратурасында.
Солтүстік Қазақстан облысының мамандандырылған ауданаралық экономикалық сотының 2026 жылғы 21 шілдедегі шешімімен аудан прокурорының талап қоюы қанағаттандырылды. 2017 жылғы электрондық аукционның қорытындылары мен «Булаев су» ЖШС жарғылық капиталындағы 51% үлесті сатып алу-сату шарты жарамсыз деп танылды.
Осылайша, Булаево қаласының тұрғындарын сумен жабдықтайтын мүлік мемлекетке қайтарылды.
«Мемлекеттік мүліктің қайтарылуы кәсіпорынды неғұрлым тиімді басқаруға, оның қызметін бақылауды күшейтуге, су құбыры желілерін жаңғыртуға қажетті ресурстарды жұмсауға және көрсетілетін коммуналдық қызметтердің сапасын арттыруға мүмкіндік береді», — деп қосты қадағалау органында.