13 тамыз таңертең Бурабайдағы Көкшетау тауында өрт шығып, ол тез арада оқшауланды. От тек 0,002 гектар орман алқабын шалып, үлкен аумаққа тараған жоқ, деп хабарлайды infohub.kz.
Өрт ошағы сағат 07:30-да «Бурабай» ұлттық паркінің Боровской орманшылығы аумағында анықталды. «Бурабай» МҰТП баспасөз қызметінің мәліметінше, өрт Көкшетау тауында, 10-шы квартал, 8-ші бөлікте, теңіз деңгейінен 300 метрден астам биіктікте тіркелген. Орманмен көмкерілген аумақтағы өрт ауданы 0,002 гектарды құрады.
Оқиға орнына ұлттық парктің күші мен құралдары дереу жұмылдырылды. Өртті сөндіруге «Бурабай» МҰТП-ның 10 қызметкері, өрт сөндіру машинасы және шағын орман өртін сөндіру кешені қатысты. Сондай-ақ жұмысқа «Қазавиаорманқорғау» РМҚК тікұшағы тартылды.
Үйлесімді әрекеттердің арқасында өрттің орман алқабына таралуына жол берілмеді. Қазіргі уақытта мамандар өрттің шығу себебін анықтап жатыр.
Ұлттық парк өрт қаупі жоғары кезеңде тіпті шағын өрт ошағы да орманға үлкен қауіп төндіруі мүмкін екенін еске салды. Парк тұрғындары мен қонақтарын өрт қауіпсіздігі талаптарын қатаң сақтауға және өрттің кез келген белгілері туралы дереу ұлттық парк қызметкерлеріне немесе 112 нөміріне хабарлауға шақырды.
Бұған дейін Бурабайдағы әйгілі Көкшетау мен Болектау тауларына туристердің шығуына тыйым салынғаны хабарланған болатын.