Chevrolet Cobalt Қазақстан мен Өзбекстан нарығындағы ең сұранысқа ие модельдердің бірі болып қала береді. Алайда көрші елде бұл седан сатып алушыға арзанға түседі. Ал танымал кроссоверлердің бірқатарын, керісінше, Қазақстаннан сатып алған тиімді, деп хабарлайды infohub.kz сайты.
2026 жылы шығарылған, 1,5 литрлік қозғалтқышпен және автоматты беріліс қорабымен жабдықталған Chevrolet Cobalt Қазақстанда 6,5 млн теңгеден бастап ұсынылады. Қыркүйек айының соңындағы ағымдағы бағам бойынша бұл шамамен 171 млн сумды құрайды. Өзбекстанда Cobalt Style MCM нұсқасы 156,1 млн сум тұрады. Осылайша, айырмашылық шамамен 15 млн сумды, яғни 570 мың теңгені құрайды, ал қазақстандық баға шамамен 10%-ға жоғары болып шығады.
Айта кетейік, Өзбекстанда 2026 жылдың қаңтар–маусым айларында орташа айлық жалақы 7,1 млн сумды құрады, бұл сол бағам бойынша шамамен 270 мың теңгеге тең. Қазақстанда осы кезеңде орташа жалақы 480,5 мың теңгеге жетті. Демек, «Кобальт» бағасының айырмашылығы Өзбекстандағы екі орташа жалақыдан асып түседі.
Танымал кроссоверлерде жағдай керісінше. Мәселен, Hyundai Tucson Қазақстанда 12,5 млн теңгеден бастап ұсынылса, Өзбекстанда бағасы шамамен 429 млн сумнан, яғни 16,3 млн теңгеден басталады. Айырмашылық 3,8 млн теңге шамасында.
Kia Sportage-те де жағдай ұқсас. Қазақстандағы ресми дилерлерде бағалар 12,8 млн теңгеден, ал Өзбекстанда 432,2 млн сумнан (≈16,4 млн теңге) басталады. Айырмашылық 3,6 млн теңгеге жетеді.
Қытайлық автомобильдер де Қазақстанда жиі арзан. Changan CS55 Plus Қазақстанда шамамен 10,5 млн теңге, ал Өзбекстанда 300 млн сум, яғни 11,4 млн теңге тұрады. Осылайша, қазақстандық кроссовер шамамен 910 мың теңгеге арзан.
Hyundai Mufasa Қазақстанда шамамен 12 млн теңгеге, ал Өзбекстанда 369 млн сумға (14 млн теңге) ұсынылады. Jetour X70 Қазақстанда 9,9 млн теңге, Өзбекстанда 286,1 млн сум, яғни шамамен 10,9 млн теңге тұрады. Haval M6-да айырмашылық аз: Қазақстанда шамамен 9,04 млн теңге, Өзбекстанда шамамен 9,52 млн теңге. Haval Jolion Қазақстанда 8,75 млн теңгеден бастап сатылса, өзбекстандық бағасы шамамен 10,6 млн теңгеге тең.
Салыстыру екі нарықтағы автомобильдердің бастапқы бағаларындағы айырмашылықты көрсетеді, бірақ комплектация ерекшеліктерін ескермейді. Қазақстан мен Өзбекстанға арналған көліктер қозғалтқыштарымен, беріліс қораптарымен, жабдықталуымен және басқа да сипаттамаларымен ерекшеленуі мүмкін. Сонымен қатар, өз бетінше әкелінген автомобильдің түпкілікті құнына логистика, кедендік және басқа да төлемдерді қосуға тура келеді.
Сондықтан көрші елдегі машинаның арзан бағасы оны Қазақстанға импорттау жергілікті ресми сатушыдан автомобиль сатып алудан тиімді болады дегенді білдірмейді.
Бұған дейін Курсив Авто Cobalt тамыз айында Қазақстанның автокөлік нарығында бірінші орынды сақтап қалғанын хабарлаған болатын.