АҚШ Орталық барлау басқармасының (ОББ) директоры Джон Рэтклифф Мәскеуге ресейлік барлау қызметінің өкілдерімен кездесу үшін жасырын сапармен келді. Бұл оның қызметке кіріскеннен бері Ресейге алғашқы сапары болуы мүмкін.
Рэтклифф ресейлік әріптестерімен байланысын сақтап, Ресейде Украинаны қолдады деген айыппен бір жылдан астам уақыт отырған ресей-америкалық азамат Ксения Карелинаны босату бойынша келіссөздерге қатысқан.
ОББ 2024 жылы Ресеймен тұтқындар алмасуға да қатысып, Wall Street Journal тілшісі Эван Гершкович, бұрынғы теңіз жаяу әскері Пол Уилан және ресей-америкалық журналист Алсу Курмашеваның босатылуын қамтамасыз еткен.
2022 жылы Ресейдің Украинаға толық ауқымды басып кіруінен бері АҚШ пен Ресей арасындағы қарым-қатынас шиеленісіп, Ресей халықаралық деңгейде оқшауланып, экономикалық санкцияларға ұшырады.
Рэтклифф — Дональд Трамптың екінші мерзімінде Ресейге барған ең жоғары лауазымды америкалық шенеуніктердің бірі. Трамп өткен жылы Аляскадағы саммитте Ресей президенті Владимир Путинмен кездескен, бірақ бұл кездесу елеулі нәтиже бермеген, ал АҚШ араласқан Ресей мен Украина арасындағы бейбіт келіссөздер тоқтап қалған сияқты.
Қосымша ақпарат BBC Verify арқылы берілді.