COVID-19 пандемиясы алкогольден туындайтын бауыр ісігінен болатын өлімнің азаю үрдісін кері қайтарды, деп хабарлайды infohub.kz.
COVID-19 пандемиясына дейін алкогольге байланысты бауыр ісігінен болатын өлім азайып келе жатқан еді, алайда 2020-2023 жылдары бұл көрсеткіш өсе бастады, деп жазады News-Medical. Ғалымдар 1990-2023 жылдар аралығындағы 204 ел мен аумақты қамтитын Global Burden of Disease зерттеуінің деректерін талдады. Олар алкогольге байланысты төрт жағдайдан болатын өлім динамикасын зерттеді: бауыр ісігі, цирроз, алкогольдік кардиомиопатия және алкогольді тұтынудан туындайтын бұзылыстар.
Цирроз, кардиомиопатия және алкогольдік бұзылыстар бойынша көрсеткіштер 1990 жылдан бері біртіндеп төмендеп келсе, бауыр ісігінен болатын өлім басқаша сипат алды. 2016-2019 жылдары бұл көрсеткіш жылына 0,74%-ға азайған болса, пандемия кезінде (2020-2023 жылдары) жыл сайын 1,73%-ға өсе бастады. Әйелдер арасындағы өсім жылына 2,73%-ды құраса, ерлерде 1,47%-ды құрады.
Зерттеушілердің пікірінше, бұл үрдістің өзгеруіне онкологиялық ауруларды скринингтеудегі ақаулар, диагностика мен емдеудің кешігуі, сондай-ақ алкоголь тұтыну әдеттерінің өзгеруі әсер етті. Модельдердің болжамы бойынша, 2050 жылға қарай алкогольден туындайтын бауыр ісігінен болатын өлім, әсіресе әйелдер арасында, өсе береді.