Бір ғана дәруменнің жетіспеуі сүт безі қатерлі ісігіне байланысты отадан кейінгі қалпына келуді айтарлықтай қиындатуы мүмкін. «Regional Anesthesia & Pain Medicine» журналында жарияланған зерттеу радикалды мастэктомиядан кейін орташа ауырсынудың үш есе артқанын анықтады, деп жазады ScienceDaily. Ғалымдар D дәруменінің төмен деңгейі (30 нмоль/л-ден аз) сүт безі қатерлі ісігін хирургиялық емдеуден кейінгі қалпына келуді қиындатып, ауырсыну синдромының қарқындылығы мен опиоидты анальгетиктерге деген қажеттілікті арттыруы мүмкін екенін анықтады, деп хабарлайды infohub.kz сайты.
Проспективті бақылау зерттеуінің нәтижелері «Regional Anesthesia & Pain Medicine» журналында жарияланды. Жұмыс 2024 жылдың қыркүйегінен 2025 жылдың сәуіріне дейін Мысырдағы Эль-Файюм университеттік ауруханасының базасында жүргізілді. Оған бір жақты модификацияланған радикалды мастэктомия жасалған 184 науқас қатысты.
Қатысушылар тең екі топқа бөлінді: D дәрумені тапшылары (орташа жасы 44) және оның жеткілікті деңгейі барлар (орташа жасы 42). Дәрігерлер мен қызметкерлер науқастардың D дәрумені мәртебесін білмеді.
Ота кезінде барлық науқасқа фентанил енгізілді, ал кейін — әр 8 сағат сайын көктамырға парацетамол және науқастың өзі басқаратын ауырсынуды басу жүйесі арқылы трамадол берілді.
Бақылаулар D дәрумені тапшы науқастар алғашқы 24 сағатта орташа ауырсынуға (10 балдық шкала бойынша 4–6 балл) үш есе жиі тап болғанын және 112 мг артық трамадол қолданғанын көрсетті.
Зерттеу авторлары D дәрумені қабыну процестері мен иммундық жүйеге әсер ететінін атап өтеді. Жұмыстың бақылау сипаты тікелей себеп-салдар байланысын дәлелдеуге мүмкіндік бермесе де, ғалымдар осы зат тапшы әйелдердің ота алдында D дәруменін қабылдауы отадан кейінгі ауырсынуды бақылауды жақсартуы мүмкін деп болжайды.