АҚШ Сенатының мүшесі Тэмми Дакворт Пентагон мен Федералдық авиация әкімшілігіне (ФАА) хат жолдап, Трамп әкімшілігінің Вирджиния штатында салуды жоспарлап отырған «Салтанат қақпасы» жобасын сынады. Ол бұл жобаны «ақылға сыймайтын» деп атап, әуе кеңістігінің қауіпсіздігін арттыруға күш салуға шақырды, деп хабарлайды infohub.kz сайты.
Дакворттың хатында: «Америка халқы Трамптың қауіпті жоспарына, әсіресе қақпаға мергендер орналастырып, дрондар ұшыруды жоспарласа, әуежайға келетін қарбалас траектория бойында 250 фут (72 м) биіктіктегі құрылыстың куәсі болуға төзе алмайды», – делінген. Хатты Би-би-сидің америкалық серіктесі Си-би-эс ньюс алған.
Алайда ФАА өткен аптада бұл ауқымды құрылыс әуежайға келетін және кететін рейстерге қауіп төндірмейді деп шешім шығарды. Бейсенбіде Трамп тағайындаған адамдар басқаратын Тарихи мұраны сақтау жөніндегі кеңес жергілікті шенеуніктермен аталған құрылыстың аймақтағы 42 тарихи нысанға әсері туралы міндетті кеңесулерді тоқтататынын жариялады.
Кеңес хабарламасында федералдық ескерткіштерді басқаратын Ұлттық парк қызметі осы нысандарға ықтимал зиянды азайту жоспарын ұсынғаны, бірақ жергілікті тарихи мұраны сақтау жөніндегі қызметкерлер «Салтанат қақпасының мақсаты мен қажеттілігіне қатысты алаңдаушылық білдіргені» айтылған. Олар сондай-ақ қызметтің ықтимал зиянды жеткілікті анықтағанына және оларды жою үшін жеткілікті шаралар жоспарлағанына күмән келтірді.
Федералдық және штаттық шенеуніктер жобаның зиянды азайту жоспарлары туралы келісімге келуге міндетті емес, ал екі тарап келісе алмаса, бұл кеңесулерді тоқтатуға рұқсат етіледі. Кеңес осы процестің қорытынды есебін келесі айдың басында ұсынуды жоспарлап отыр.
Сонымен қатар, Вирджиния штатынан сайланған Демократиялық партияның конгресмені Дон Бейер қақпа тұрғызылатын алаңда қазба жұмыстары басталып кеткенін айтады.
Қақпаға қарсы конгресс оппозициясын басқарып отырған Бейер бейсенбіде алаңға барғанда ауыр техникамен жұмыс істеп жатқан жұмысшыларды көргенін, олар оған «топырақ құрамын бағалау үшін археологиялық жұмыстар жүргізіп жатқанын» айтқанын жеткізді. Бұл «қатты алаңдатады», дейді Бейер, әсіресе әкімшілік жұмыс басталғанға дейін 48 сағат бұрын хабарлауға міндетті болғандықтан. «Әкімшілік осы жобаның салдарын түсіну үшін қажетті қарапайым жұмысты әлі атқармай тұрып, алаңдағы қызметті жалғастырып жатқан сияқты», – деп жазды Бейер.
Осы жылдың басындағы дизайн жобасында қақпаның төбесінде алтын қанатты Азаттық ханымы, оның екі жағында екі алтын қыран бейнеленген, ал құрылыстың екі жағына алтын әріптермен «One Nation Under God» және «Liberty and Justice for All» деген сөздер жазылған.