Қазақстанның денсаулық сақтау жүйесінде бейінді мамандар тапшылығы айқын сезілуде. Қазақстан Республикасының Денсаулық сақтау министрлігі медициналық кадрларға деген қажеттіліктің ресми есебін жариялады, деп хабарлайды infohub.kz сайты.
Құжатқа сәйкес, ең сұранысқа ие мамандықтар қатарына реаниматологтар, хирургтар, офтальмологтар мен неврологтар кірді. Ал барлық деңгейдегі акушер-гинекологтарға деген жалпы қажеттілік 1,8 мың адамнан асты.
«Осы бұйрыққа 1-қосымшаға сәйкес денсаулық сақтау саласының кадрларға деген қажеттілігін және медициналық мамандықтар бойынша оқуға қабылдау көлемін бекітуді бұйырамын», — делінген бұйрық мәтінінде.
Құжатқа сәйкес, мамандарға деген қажеттілік бағыттар бойынша былайша бөлінді: акушерлік және гинекология (ересектер, балалар) барлық деңгейде — 1 834 маман; амбулаториялық-емханалық ұйымдар мен ауылдық елді мекендердегі ұйымдар үшін акушерлік және гинекология — 801 маман; жалпы дәрігерлік практика — 642 маман; анестезиология және реаниматология (ересектер, балалар) — 1 043 маман; жалпы хирургия — 941 маман; офтальмология (ересектер, балалар) — 861; неврология (ересектер, балалар) — 731; травматология-ортопедия (ересектер, балалар) — 573; инфекциялық аурулар (ересектер, балалар) — 408; кардиология (ересектер, балалар) — 485 және басқалары.
Жалпы алғанда, қазақстандық ауруханалар мен емханаларға бүгінгі таңда әртүрлі мамандықтағы 8,3 мыңнан астам дәрігер қажет.
Бұйрыққа осы жылдың 1 қазанында қол қойылды.
Бұған дейін «Курсив» соңғы екі жылда республикада дәрігерлер тапшылығы шамамен 20%-ға азайғанын жазған болатын. Ауылдық жерлерде бұл көрсеткіш тіпті 26,7%-ға қысқарды.