2025 жылдың қорытындысы бойынша Dent-Lux стоматологиялық клиникалар желісі 257,7 млн теңге таза пайда тапты. Бұл өткен жылмен салыстырғанда 28%-ға аз (356,3 млн теңге). Компанияның табысы да 4,8 млрд-тан 4,2 млрд теңгеге дейін төмендеді, деп хабарлайды infohub.kz сайты.
Негізгі кіріс, бұрынғыдай, стоматологиялық қызметтерден түсті – 3 млрд теңге (2024 жылы – 3,8 млрд), тағы 1,3 млрд теңге (1,1 млрд) компания медициналық қызметтерден тапты. Dent-Lux-тың 2025 жылдың соңындағы бөлінбеген пайдасы 3,13 млрд теңгені құрады.
Dent-Lux Алматыда тіркелген, алайда есептіліктегі деректерге қарағанда, оның Астана, Орал, Өскемен, Көкшетау және Атырау қалаларында филиалдары бар. Мысалы, тек Астанада компанияның Абай даңғылында, 4-шағынауданда төрт клиникасы және Сарайшық көшесінде екі клиникасы бар.
Dent-Lux-тың Алматыдағы жүз пайыздық еншілес компаниясы – Medical Park, халыққа медициналық қызмет көрсетеді. Топ сондай-ақ Алматының Алмалы ауданындағы ғимараттар мен жерлерді жалға береді.
2022 жылдың қарашасында акционерлер компанияның орналастырылған акцияларының бір бөлігін сатып алу туралы шешім қабылдады – барлығы 25,3 мың акция (3,79% акция) 357,4 млн теңгеге сатып алынды.
Материал дайындалған кезде Dent-Lux акцияларының 100% жеке DL Medical Ltd. компаниясына тиесілі, оның тең иелері – Мұрат Әбдірахманов пен Светлана Әбдірахманова.
Мұрат Әбдірахманов 2022 жылы Forbes Қазақстанның ең ықпалды бизнесмендері тізімінде 22-орынды, 2011 жылы 49-орынды иеленді, алайда ең бай қазақстандықтар тізімінде ешқашан болған емес. Мұрат Әбдірахманов – венчурлық инвестор, Қазақстанда және шетелде жобалары бар. Атап айтқанда, ол Chocofamily, HR Messenger, UvU, Easytap және басқа да компанияларға ақша салған.
БАҚ хабарлағандай, мысалы, Мұрат Әбдірахманов 2016 жылы Choco стартапына $1 млн салған, ал 2023 жылы Chocofamily Holding Aviata және Chocotravel сервистерін Freedom Holding Corp. холдингіне сатуды жариялағанда, ақшаны шығарған. Мұрат Әбдірахманов бастапқы инвестицияны бірнеше есе арттырып, жобадан шыққанын атап өтті.
Adata.kz деректері бойынша, Мұрат Әбдірахманов бірқатар компаниялар мен ұйымдардың иесі. Олардың ішінде – Zeinet, Telecom-Investments, «Мунайгаз» инжинирингтік компаниясы, «Три» компаниясы (Мирастың салтанат залы), «Аспан Тау Ауылы» өндірістік кооперативі, сондай-ақ Easytap Ltd., Onevision Limited, Atacom Holding Limited, Uvu International Ltd., Prosper Group Ltd., BPM Tracker Limited, CODE-FP Ltd., Luna Eight Ltd. және Aula Ltd. жеке компаниялары. Сонымен қатар, оған «Ана Үйі», «Ұлттық асырап алу агенттігі» қоғамдық қорлары және Club Zhenis Yachting, сондай-ақ Marina Club қоғамдық бірлестігі тиесілі.
Светлана Әбдірахманова «Юниверсал Эксес» (Universal Access, Алматы) компаниясына иелік етеді.
«Ұлттық асырап алу агенттігі» және «Ана Үйі» қорларының құрылтайшылары сондай-ақ Айдын Рақымбаев (Forbes тізімінде $1,1 млрдпен тоғызыншы орын) және Эдуард Ким ($197 млнмен 52-орын) болып табылады.