«Аватар» киноәлемінің жасаушысы әрі «Титаник» фильмінің режиссёрі Джеймс Кэмерон Орталық Азияға келіп, аймақтағы жалғыз шеберлік сабағын өткізбек. «Создавая миры» (Әлемдер жарату) деп аталған шара Қырғызстанда өтеді. Бұл туралы Gamma Media компаниясының жетекшісі Ислам Сатаров мәлімдеді, деп хабарлайды infohub.kz сайты.
Кездесудің нақты уақыты мен орны кейінірек белгілі болады. Алайда режиссёрдің келуі туралы алдын ала уағдаластыққа қол жеткізілген. Сатаров бұл шеберлік сабағының Орталық Азиядағы жалғыз болатынын ерекше атап өтті.
Кездесудің бағытын ұйымдастырушы былай сипаттады: «Режиссёр, сценарист, продюсер, өнертапқыш және мұхит зерттеушісі. National Geographic зерттеушісі, Хаббард медалінің иегері. 2012 жылы ол тарихта бірінші болып Мариан шұңқырындағы Челленджер тереңдігіне жалғыз жетті. Ол бүгін біздің болашағымызды қалай көреді? Басқалардан бұрын нені байқайды? Қандай жаңалықтар оны шабыттандырады, қандай өзгерістер алаңдатады?».
Джеймс Кэмерон — кино тарихындағы ең танымал және кассалық фильмдердің авторы. Оның жұмыстарының қатарында «Терминатор», «Бөтен», «Титаник» және «Аватар» фильмдер сериясы бар. «Титаник» үшін режиссёр үш «Оскар» сыйлығын алды, оның ішінде үздік режиссура үшін.
Бұған дейін Kursiv LifeStyle «Бишкек-арена» ашылғаннан кейін Шакираның концерті Қырғызстанда өтетінін жазған. Оның Қазақстанға келу ықтималдығы туралы Astana Concert өкілі Малик Хасенов айтқан.