Қазақстан қор биржасында доллар бағамы 2024 жылдың маусымынан бері алғаш рет 450 теңгеден төмендеді. 14 қыркүйектегі сауда қорытындысы бойынша американдық валюта 0,42%-ға, яғни 1,88 теңгеге арзандап, 448,9 теңгеге жетті, деп хабарлайды infohub.kz сайты.
Сессия барысында доллардың ең төменгі бағасы 446,75 теңге болды. Сауда көлемі орташа деңгейде – 440 миллион долларды құрады. Күн қорытындысы бойынша орташа өлшенген бағам бір доллар үшін 447,94 теңге болып қалыптасты. Айырбастау пункттерінде доллар 450,5 теңгеден сатылуда.
Қазақстан қаржыгерлер қауымдастығы өз шолуында бағамның тұрақты динамикасы Ұлттық банк операциялары аясында шетел валютасына сұраныс пен оның ұсынысы арасындағы тепе-теңдіктің сақталып отырғанын көрсететінін атап өтті.
Бұған дейін Freedom Holding Corp. мажоритарлық акционері Тимур Турлов қазақстандық капитал нарығында қазіргі жоғары нақты мөлшерлемелер сақталса, доллардың ұлттық валютаға қатысты бағамы 400 теңгеден төмен түсуі мүмкін екенін мәлімдеген болатын.