Дубайдан Тель-Авивке ұшқан FlyDubai әуекомпаниясының ұшағы «ұрлау» туралы апат сигналын берді. Ұшақ ішінен алғашқы кадрлар жарияланды, деп хабарлайды infohub.kz сайты.
SHOT Telegram-арнасы ұшақтан түсірілген алғашқы суретті жариялады. Фотосуретте шабуылдаушымен күрескен болжамды жолаушы бейнеленген. Ол қанға боялған.
«Ұшақта болғандардың бірінің айтуынша, экипаж мүшелерінің біреуі ұшқышты пышақпен жаралап, ұшақ жүйелерінің бір бөлігін істен шығарған. Сонда жолаушы Янив тағы бір ер адаммен бірге кабинаға басып кіріп, шабуылдаушыны залалсыздандырған. Сол жолаушының айтуынша, бақытымызға орай, ұшақта тағы екі ұшқыш болған. Олар оқиғадан кейін Boeing-ді Сауд Арабиясында қондырған. Басқа нұсқа бойынша, жолаушылар өзара төбелескен болуы мүмкін», — делінген хабарламада.
Израильдің i24 телеарнасының хабарламасында (аудармасын РБК келтірген) тергеу барысында билік ұшқыштардың біреуі ұшақты әдейі құлатпақ болған деген нұсқаны тексеріп жатқаны айтылады. Оның әрекетін екінші ұшқыш пен израильдік жолаушылар тоқтатып, апаттың алдын алған болжам бар.
Телеарна бұл нұсқа Flightradar сервисінің деректерін түсіндіруі мүмкін екенін атап өтті. Онда ұшақтың бір минут ішінде 14 мың футқа (шамамен 4,2 км) күрт төмендегені тіркелген.
Сонымен қатар, Mash Telegram-арнасы ұшақтан түсірілген алғашқы бейнені жариялады. Онда иллюминатордан көрініс байқалады, сондай-ақ бейнеде айқайлар естіледі. Ал Bild басылымы бірінші ұшқыш (ресейлік) пышақпен өзін өлтіруге әрекеттенгенін хабарлайды. Екінші ұшқыш (украиналық) оған кедергі келтіріп, ұшақтың құлауын болдырмаған. Бұл нұсқа әзірге расталмаған.
Бұған дейін БАҚ-та Boeing 737 жолаушылар ұшағы Сауд Арабиясы үстінен бұрылыс кезінде апаттық жағдай туралы сигнал бергені туралы ақпарат шыққан. Ол ұрлау немесе заңсыз араласу дегенді білдіретін 7500 кодын жіберген.
Израиль Әскери-әуе күштерінің истребительдері ұшаққа қарай көтерілген. Кейін әуе кемесінің Сауд Арабиясына қонғаны белгілі болды.
Одан кейін Flydubai әуекомпаниясы израильдік телеарнаға Дубай-Тель-Авив рейсінде ұшқыштар арасында ұшақ бортында төбелес болғанын хабарлады. Жергілікті БАҚ экипаж екі ұшқыштан тұрғанын, біреуі Ресейден, екіншісі Украинадан екенін мәлімдейді.
Израиль премьер-министрі Биньямин Нетаньяхудың кеңсесі FlyDubai әуекомпаниясының апат сигналын берген ұшағындағы төтенше жағдайға қатысты пікір білдірді.