Қазақстанда жартыжылдық қорытындысы бойынша жұмыссыздық деңгейі 4,5% болды, ал медициналық-әлеуметтік сараптамалардың 45%-дан астамы қашықтықтан жүргізілуде. ҚР Еңбек және халықты әлеуметтік қорғау министрі Асқарбек Ертаевтың төрағалығымен кеңейтілген алқа отырысы өтіп, онда 2026 жылдың бірінші жартысының қорытындысы шығарылып, жыл соңына дейінгі міндеттер белгіленді, деп хабарлайды infohub.kz сайты.
Бірінші вице-министр Ербол Туяқбаев еңбек құқықтарын қорғау жұмысының нәтижелері туралы баяндады. Оның айтуынша, мемлекеттік инспекторлар алты айда 3607 тексеріс жүргізген – бұл өткен жылдың осы кезеңімен салыстырғанда 22,6%-ға артық. Бақылау барысында еңбек заңнамасының 4 мыңнан астам бұзушылығы анықталып, жұмыс берушілерге 2,3 мыңнан астам міндетті нұсқама беріліп, әкімшілік ықпал шаралары қабылданған.
Вице-министр Эльдар Кузенбаев еңбек нарығындағы ахуалды баяндады. Ол жартыжылдық қорытынды бойынша елде жұмыссыздық деңгейі 4,5% құрағанын атап өтті. Оның сөзінше, жұмыспен қамту қызметінің басым бағыттарының бірі – мемлекеттік қызметтердің жеделдігі мен сапасын арттыру үшін цифрлық технологиялар мен жасанды интеллект негізіндегі шешімдерді енгізу.
Вице-министр Виктория Шегай медициналық-әлеуметтік сараптама мен әлеуметтік қорғау жүйесінің дамуы жөнінде ақпарат берді. Ол МӘС-тің қашықтық форматы кеңейіп келе жатқанын атап өтіп, бүгінде сараптамалардың 45%-дан астамы осы форматта жүргізіліп жатқанын мәлімдеді. Әлеуметтік қорғау саласындағы жұмыс кешенді түрде – заңнаманы жаңарту, цифрлық сервистерді дамыту, оңалту инфрақұрылымын күшейту және мемлекеттік бақылауды күшейту арқылы жүргізілуде.