Еуроодақ елдерінің ішкі істер министрлері Сеутадағы көші-қон дағдарысынан кейін Испанияға толық қолдау білдіріп, сыртқы шекараларды қорғауды күшейту шараларын келісті, деп хабарлайды infohub.kz сайты.
Талқылау барысында испан билігіне толық қолдау білдірілді, деді Еуроодақтың ішкі істер жөніндегі комиссары Магнус Бруннер. Ол мигранттар ағыны еуропалық шекаралар қауіпсіздігі үшін елеулі сынақ болғанын атап өтіп, келгендердің ешқайсысы Испанияның материктік бөлігіне немесе Шенген аймағына өте алмағанын жеткізді.
Ирландияның әділет және ішкі істер министрі Джим О'Каллаган Испанияның Сеутадағы жағдайға жылдам әрекетін жоғары бағалап, Еуроодақтың елді қолдауға және сыртқы шекараларды заңсыз көші-қоннан қорғауға біртұтас дайын екенін мәлімдеді.
Испан үкіметінің деректері бойынша, Сеутамен шекараны кесіп өткен шамамен 72 мың адамның 70 мыңға жуығы Мароккоға қайтарылған. Қалған жағдайлар қаралуда. Испанияның ішкі істер министрі Фернандо Гранде-Марласка тұруға құқығы жоқ адамдардың да қайтарылатынын, олардың Шенген аймағына өтуіне қатысты алаңдаушылық расталмағанын атап өтті.
Кездесу қорытындысы бойынша министрлер контрабандистермен күресті күшейтуге, заңсыз мигранттарды қайтару рәсімдерін жылдамдатуға, шығу және транзит елдерімен ынтымақтастықты кеңейтуге, сондай-ақ әлеуметтік желілерді талдауды қоса алғанда, ерте ескерту жүйелерін жетілдіруге келісті.
Бұған дейін 30-нан 31 шілдеге қараған түні мыңдаған марокколық мигрант Африканың солтүстігіндегі испандық Сеута анклавындағы шекараны бұзып өтіп, Испания билігін армияны жұмылдыруға мәжбүр еткені хабарланған болатын. Италия премьер-министрі Джорджа Мелони Испаниямен шекарада шекаралық бақылауды уақытша қалпына келтіруді қоса алғанда, шекаралар мен азаматтар қауіпсіздігін қорғау үшін төтенше шаралар қабылдауға дайын екенін мәлімдеді.
Испан билігі жұма күні кешке қарай мигранттардың көпшілігі Сеутадан кетіп, Мароккоға қайтқанын атап өтті. Бастапқыда шекара қабырғасы арқылы өтуге тырысқан кезде кемінде 57 мигрант қаза тапқаны, олардың денелері судан алынғаны хабарланған. Марокко Испанияға мигранттар ағынының себептерін түсіндірді.