Еуропалық Одақ Украинадағы қақтығысқа байланысты Ресейге қарсы 21-ші шектеу шаралары пакетін енгізді. Бұл туралы Еуропалық Кеңестің сайтында хабарланды, деп хабарлайды infohub.kz сайты.
Жаңа пакет Ресей экономикасына және оның Украинаға қарсы соғыс әрекеттерін қаржыландыру қабілетіне барынша әсер ететін салаларға қатаң экономикалық санкцияларды қамтиды. Сондай-ақ 48 жеке тұлға мен 170 ұйымға қатысты санкциялар енгізілді. 94 банк пен ірі қаржы мекемелерінің активтерін тоқтату және оларға қаражат беруге тыйым салу қарастырылған.
Грузия, Панама, Біріккен Араб Әмірліктері, Маршалл аралдары, Қырғызстан және Беларусьте тіркелген 14 криптовалюта платформасы шектеуге ілікті. ЕО 2027 жылғы 15 шілдеге дейін ресейлік мұнайға баға төбесі механизмін автоматты түрде түзетуді тоқтата тұрады.
Сондай-ақ ресейлік «көлеңкелі флотқа» қарсы санкциялар кеңейтілді — санкциялық тізімге тағы 41 кеме қосылды, нәтижесінде санкцияланған кемелердің жалпы саны 673-ке жетті. ЕО әскери-өнеркәсіп кешенін қолдағаны үшін қосарланған мақсаттағы тауарлар мен технологияларға қатаң экспорттық шектеулер қолданылатын тізімге 51 жаңа ұйымды қосты.
«Осы ұйымдардың кейбіреулері үшінші елдерде (Қытай, оның ішінде Гонконг, Үндістан, Қазақстан, Қырғызстан, Түркия және Біріккен Араб Әмірліктері) орналасқан және Ресейдің экспорттық шектеулерді айналып өтуіне ықпал етеді, соның ішінде микроэлектроника, сандық бағдарламалық басқарылатын станоктар және жартылай өткізгіштерді өңдеуге арналған жабдықтар бойынша», — делінген мәлімдемеде.
Жаңа пакет Украинаға қарсы ұрыс қимылдарына қатысқан ресейлік қарулы күштер мен басқа да құрылымдардың әскери қызметшілері мен бұрынғы әскери қызметшілеріне виза беруге толық тыйым салуды енгізу үшін құқықтық негіз жасайды. Бұл шараның күшіне енуі туралы түпкілікті шешімді ЕО Кеңесі кейінірек қабылдайды. Кейбір тауарларға экспорттық және импорттық шектеулер енгізіледі.