Швейцарияның Оберхофен қаласында өткен жиында Халықаралық шаңғы және сноуборд федерациясы (FIS) Ресей мен Беларусь спортшыларына биылғы маусымда бейтарап мәртебемен жарыстарға қатысуға рұқсат беруді жалғастыру туралы шешім қабылдады. Алайда оларға мемлекеттік рәміздерді пайдалануға тыйым салынады. Бұл туралы infohub.kz сайты хабарлайды.
FIS басқарушы органының мәлімдеуінше, аталған елдердің спортшылары, жаттықтырушылары мен ресми өкілдері FIS бекіткен қағидаттарға негізделген бейтараптық декларацияға қол қойған жағдайда ғана жарыстарға жіберіледі. Бұл талапты бұзғандарға санкция қолдану қарастырылған.
Еске салайық, ресейлік шаңғышылар желтоқсан айында Халықаралық спорт төрелігі сотында (CAS) жеңіске жетіп, Украинадағы соғысқа байланысты халықаралық жарыстарға қатысуға тыйым салынған төрт жылға жуық уақыт аяқталған еді. Бұл шешім оларға Альпі шаңғысы, кросс-кантри, фристайл және сноуборд бойынша әлем кубогы кезеңдеріне қайта оралуға мүмкіндік берді. Олар ақпан айында өтетін Милан-Кортина Олимпиадасына іріктеуге қатыса алады.
FIS басқару кеңесі келесі айда басталатын қысқы маусымға арналған бейтарап спортшылар саясатын жаңартты. Ұйым спортшылардың қатысуы жеке жарыстармен шектелетінін және ту, әнұран немесе киім үлгісі сияқты ел рәміздерін көрсетуге болмайтынын атап өтті.
Ресейлік спортшылар мен команда өкілдері әлем кубогы кезеңдерін өткізетін кейбір еуропалық елдерге виза алуда қиындықтарға тап болуы әбден мүмкін.