Германияның бұрынғы Сыртқы істер министрі Йошка Фишер Еуропа мемлекеттері мен Америка Құрама Штаттары арасындағы қайшылықтар тереңдей түскен жағдайда Солтүстік Атлантикалық альянстың бүгінгі қалпында сақталып қалуы екіталай деп күмән білдірді. Ол бұл туралы неміс басылымы Die Zeit жариялаған сұхбатында айтты, деп хабарлайды infohub.kz сайты.
Фишердің айтуынша, Еуропа мен АҚШ арасындағы алшақтық НАТО-ның ыдырауына әкелуі мүмкін. «Бірге болсақ, күштіміз, бірақ „трампистермен“ ортақ нормативтік негізіміз жоқ, мұны мойындау қиын болса да. НАТО аман қалады деп ойламаймын», — деді ол.
Германияның сыртқы саясат ведомствосының экс-басшысы трансатлантикалық қатынастарды сақтап қалу үшін өзара іс-қимылдың жаңа негізін қалыптастыру қажет екенін атап өтті. Оның пікірінше, бұл үдерісте шешуші рөлді Еуропаның өзі саяси және әскери мүмкіндіктерін нығайту арқылы атқаруы тиіс.
Фишер сондай-ақ АҚШ-тың НАТО-ның еуропалық бөлігіндегі үстемдік кезеңі аяқталғанын, аймақ елдері өз қауіпсіздігін дербес қамтамасыз ете алатындай болуы керектігін атап өтті.
Бұған дейін НАТО Бас хатшысы Марк Рютте альянстың ұйым басшылығында еуропалық елдердің рөлін күшейту бағытында жалғасып келе жатқанын мәлімдеген. Оның айтуынша, Еуропада қауіпсіздікті қамтамасыз етуге деген көзқарас өзгеріп жатыр.