Қазақстандық ForteBank 2025 жылдың қорытындысы бойынша басқарма мүшелеріне төленген сыйақының жалпы көлемін екі еседен астамға қысқартты. Топ-менеджментке төлемдердің күрт төмендеуі елдің қаржы нарығындағы ірі M&A мәмілелерінің бірі — Home Credit Bank сатып алумен тұспа-тұс келді, деп хабарлайды infohub.kz сайты.
Қазақстан қор биржасында (KASE) жарияланған құжатқа сәйкес, банктің атқарушы органы мүшелеріне 2025 жылы төленген жиынтық төлем 1,86 млрд теңгені құрады. Бұл сомаға лауазымдық жалақылар, сондай-ақ басқарма құрамында болған кезеңде топ-менеджерлерге ақшалай түрде төленген барлық көтермелеу түрлері кіреді.
2025 жылғы көрсеткіш алдыңғы есепті кезеңмен салыстырғанда 2,12 млрд теңгеге (немесе 53%-ға) аз болды. 2024 жылдың қорытындысы бойынша басшылыққа төленген жалпы сыйақы 3,97 млрд теңгеге жеткен еді.
Қаржылық есептілік бойынша аудиторлық есепке сәйкес, 2025 жылдың соңында ForteBank басқармасының құрамына сегіз адам кірді: Талғат Қуанышев (басқарма төрағасы); Равшан Ирматов (төрағаның орынбасары, қаржы директоры); Алма Әбілжанова (корпоративтік бизнес бойынша басқарушы директор); Ануар Болғауов (заң мәселелері бойынша басқарушы директор); Нариман Жарқынбаев (бөлшек бизнес бойынша басқарушы директор); Сергей Карташов (ақпараттық технологиялар бойынша басқарушы директор); Анна Пилипенко (операциялық қызмет бойынша басқарушы директор); Ернар Тәшенов (шағын және орта бизнес және филиалдар желісі бойынша басқарушы директор).
2026 жылдың қаңтарында атқарушы органның құрамы өзгерді, Ернар Тәшенов пен Нариман Жарқынбаевтың өкілеттіктері ресми түрде тоқтатылды. Салыстыру үшін, 2024 жылғы 31 желтоқсандағы жағдай бойынша банк басқармасы алты адамнан тұрды (Талғат Қуанышев, Равшан Ирматов, Амырхан Чиканаев, Астан Сагитов, Гаухар Бисембиева, Айдын Әуезқанов). Бұған қоса, 2024 жылғы 31 қазанға дейін қаржы институтын Бекжан Пірматов басқарды, кейін оны төраға лауазымында Талғат Қуанышев алмастырды (ол 6 желтоқсанда ресми түрде қызметіне кірісті).
Банк топ-менеджментіне бонустардың қысқаруы қаржы институтының экспансиясы аясында болды. 2026 жылғы 23 сәуірде ForteBank-тің Home Credit Bank қаржы институтын сатып алу мәмілесі аяқталғаны хабарланды. Бақылау пакетін сатып алу мәмілесінің сомасы 273 млрд теңгеге бағаланды, бұл транзакцияны Қазақстанның банк секторындағы соңғы жылдардағы ең ірі бірігулердің біріне айналдырды.
ForteBank активтері бойынша Қазақстанда бесінші орында және 25 жылдан астам тарихы бар. Ол 2015 жылы Forte-дің «Альянс Банк» және «Темірбанк»-пен бірігуі нәтижесінде құрылған. Банктің мажоритарлық акционері — Болат Өтемұратов. 2025 жылдың қорытындысы бойынша ForteBank активтері 6,1 трлн теңгені, міндеттемелері 5,33 трлн теңгені, капиталы 774,9 млрд теңгені, таза пайдасы 191 млрд теңгені құрады. 2026 жылғы 1 шілдедегі жағдай бойынша банктің пайдасы 68,9 млрд теңгені құрап отыр.