Гаагадағы халықаралық сот Косово босату армиясының бұрынғы қолбасшысы, кейіннен мойындалмаған Косово республикасының президенті болған Хашим Тачиді 1990 жылдары Сербиямен қарым-қатынасты күшпен үзу кезінде жасалған соғыс қылмыстары үшін 25 жылға бас бостандығынан айырды, деп хабарлайды infohub.kz сайты.
Тачидің өзі барлық айыптауларды жоққа шығарды.
Сот қаулысына сәйкес, соғыс қылмыстары үшін Косово босату армиясының басшылығында жоғары лауазымдар атқарған серіктері Реджеп Селеми, Кадри Весели және Якуп Красничи де қылмыстық жауапкершілікке тартылды.
«Барлық төрт айыпталушы 385 адамды заңсыз ұстау, 49 адамға қатыгездік көрсету, 303 адамды азаптау және 96 адамды өлтіру сияқты соғыс қылмыстары үшін қылмыстық жауапкершілікке тартылады», — делінген сот қорытындысында.
Алайда сот алқасы айыпталушыларды адамзатқа қарсы қылмыстар бойынша кінәсіз деп таныды, өйткені Арнайы прокурор бейбіт тұрғындарға ауқымды немесе жүйелі шабуыл болғанын дәлелдей алмады. Айыпталушылар соғыс қылмыстарының бірқатар нақты эпизодтары бойынша да кінәсіз деп танылды.
Сот Косоводағы қақтығыс кезінде Тачи, Весели, Селими және Красничидің ортақ қылмыстық мақсатқа — Косово босату армиясының саяси және әскери мақсаттарына қарсы деп саналған адамдарды қудалауға — айтарлықтай үлес қосқанын анықтады.
Сот шешіміне сәйкес, Тачи осы ортақ мақсатты әзірлеу мен жүзеге асыруда шешуші рөл атқарды. Ол ұстау орындарын құруды, Косово босату армиясына қарсы деп қабылданған адамдарды анықтауды, оларды тұтқындау мен ұстауды және қажет болған жағдайда өлтіруді қамтыды.