Ғалым Әшімов Теміртау әкімі қызметінен кететінін мәлімдеді. Ол бұл қызметті 2024 жылдың қыркүйек айынан бері атқарып келді, деп хабарлайды infohub.kz сайты.
Бұрынғы әкім Instagram-дағы парақшасында қала тұрғындарына жүгініп, жұмысын аяқтайтынын хабарлады. Ол әрбір тұрғынға белсенді азаматтық ұстанымы мен ашық диалогы үшін ерекше алғысын білдірді.
«Мұндай ашық қарым-қатынас нақты мәселелерді көруге және оларды бірлесіп шешу жолдарын табуға мүмкіндік берді», — деді Әшімов.
Ол Теміртау мен оның тұрғындарына қызмет ету өзі үшін үлкен мәртебе болғанын, ал жүрегінің бір бөлігі металлургтер қаласында мәңгі қалатынын айтты.
«Теміртаудың игілігі үшін бірге еңбек етіп, қаланың дамуына үлес қосқан барлық азаматтарға шын жүректен алғыс білдіремін. Теміртау қаласына бейбітшілік, тұрақтылық, гүлдену және жаңа жетістіктер тілеймін. Әр үйде амандық, молшылық және ертеңгі күнге сенімділік орнасын. Сенімдеріңізге рахмет! Бірлескен еңбектеріңіз үшін алғыс айтамын!» — деп жазды шенеунік.