Ауқымды блэкаут Грузияны тұралатты – астана Тбилисиді қоса алғанда, елдің көп бөлігі жарықсыз қалды. Төтенше оқиғаның себептері әзірге анықталып жатыр, деп хабарлайды infohub.kz.
Жергілікті бұқаралық ақпарат құралдарының мәліметінше, электр қуатының өшірілуі ел аумағының көп бөлігін қамтыған. Әртүрлі өңірлерден әлеуметтік желі қолданушылары жарықтың жоғалғаны туралы хабарлаған. Бұл ақпаратты Батуми, сондай-ақ Гурия, Самегрело, Рача және Әскери-Грузин жолына жақын орналасқан Душети тұрғындары растады.
Тбилисиде орталық көшелерде бағдаршамдар мен көше жарықтандырулары жұмыс істемей қалды, бұл көлік қозғалысы мен жаяу жүргіншілерге үлкен қиындық туғызды.
Болжам бойынша, ауқымды ақаудың себебі электр станцияларының біріндегі ірі апат болуы мүмкін. Нақты жағдайлар туралы ресми түсініктемелер әзірге түскен жоқ.
Кейінірек Грузияның Мемлекеттік электр жүйесі электрмен жабдықтауды кезең-кезеңімен қалпына келтіре бастағанын хабарлады. «Бүкіл ел бойынша электрмен жабдықтауды қалпына келтіру кезең-кезеңімен жалғасуда. Қазіргі уақытта Тбилисиде – Дидубе, Ваке, Мтацминда және Крцаниси аудандарында электр қуаты ішінара қалпына келтірілді. Сондай-ақ Кутаиси, Чиатура, Сачхере, Они және Амбролаури қалаларының бір бөлігінде электрмен жабдықтау қалпына келтірілді», – деп мәлімдеді ведомство.