Қазақстандық Higgsfield AI стартапы жақында $1 млрд-тан астам бағаланып, «единорогтар» қатарына қосылған еді. Қазір ол Fortune 500 тізімінен 390 компанияны тартып үлгерді. Бұл туралы компанияның бас директоры және негізін қалаушылардың бірі Александр Машрабов Astana Hub YouTube-арнасында берген сұхбатында айтты, деп хабарлайды infohub.kz.
Оның айтуынша, стартаптың негізгі табысы маркетинг саласынан түседі. «Табыстың жартысынан көбі маркетингпен айналысатын компаниялардан келеді. Негізінен әлеуметтік медиа маркетингі», – деді Машрабов.
Екінші маңызды бағыт ретінде ол ойын-сауық индустриясын атады. Оның сөзінше, бұл нарық неғұрлым орталықтандырылған: клиенттер саны айтарлықтай аз, бірақ олардың әрқайсысы көбірек табыс әкеледі.
Машрабов сондай-ақ Higgsfield технологиясын қолданған алғашқы ірі жарнамалық науқандардың бірі АҚШ-тағы Coca-Cola-ның рождестволық жарнамасы болғанын айтты. «Ең алғашқы үлкен активация – Америкада Coca-Cola Рождествоға өз жарнамасын шығарған кезде, ол Higgsfield-те жасалған еді», – деді ол.
Кәсіпкердің айтуынша, мұндай жарнамаға аудиторияның реакциясы алғашында теріс болды, өйткені жаңа технологиялар дәстүрлі түрде қарсылық тудырады. Алайда кейін маркетингте ИИ-видеоны қолдану брендтер үшін әдеттегі құралға айналды. «Сол кезден бастап маркетинг саласындағы AI видео абсолютті нормаға айналды», – деп атап өтті Машрабов.
Ол бүгінде платформада Fortune 500 тізімінен 390 компания бар екенін қосты.
Higgsfield басшысының сөзінше, қазір нарықта AI-native студиялар мен агенттіктердің өсуі байқалады, олар жасанды интеллект көмегімен толық циклді жарнамалық науқандар жасайды. ИИ Super Bowl, FIFA футболдан әлем чемпионаты және Олимпиада ойындары сияқты ірі оқиғаларға байланысты жарнамаларда қолданылған.
Бұған дейін «Курсив» Higgsfield AI $1 млрд-тан астам бағаланған жеке компания ретінде «единорог» мәртебесіне ие болған алғашқы қазақстандық стартап болғанын жазған еді. Стартапты Машрабов пен Ерзат Дулат құрған. Компания мәтіндік сұраныстар бойынша бейнеконтент жасауға арналған генеративті бейнемодельдерді әзірлейді.
Компания деректері бойынша, оның өнімдерін 11 миллионнан астам адам пайдаланады, ал платформа арқылы жасалған контенттің қаралым саны 1,2 миллиардтан асты. Сонымен қатар, Higgsfield-тің техникалық директоры Ерзат Дулат бұған дейін компания командасының шамамен 90%-ы Nazarbayev University түлектері екенін мәлімдеген.
Fortune 500 – қаржы жылындағы жалпы табыс көлемі бойынша іріктелген АҚШ-тың 500 ірі корпорациясының беделді жыл сайынғы рейтингі. Бұл тізімді ықпалды американдық іскерлік Fortune журналы 1955 жылдан бері жариялап келеді. Бұл тізімге ену бизнестің жоғары экономикалық табысы мен тұрақтылығының символы саналады.