Қазақстан аумағында 5 қазанда басталған «Қауіпсіз үй» жедел-профилактикалық іс-шарасы аясында полицейлер тұрғын нысандарды жаппай тексереді. Рейдтердің аралық нәтижелерін Ішкі істер министрлігі жариялады, деп хабарлайды infohub.kz сайты.
ІІМ-нің ақпараттық медиапорталының мәліметінше, өткен кезеңде полицейлер 249 мыңға жуық тұрғын нысанды аралап шықты, оның ішінде 12,5 мың жалдамалы пәтер бар. Іс-шараның басты мақсаты — тұрғын секторда құқық бұзушылықтың алдын алу.
«Тексерулер барысында тіркеусіз тұрудың 9 мыңға жуық фактісі анықталып, жолы кесілді. 7 189 шетелдік азамат әкімшілік жауапкершілікке тартылды. Полиция органдарына тұрақты тұрғылықты жері жоқ 2 128 адам жеткізілді», — деп хабарлады ведомствода.
Қатар профилактикалық есепте тұрған адамдармен жұмыс жүргізілуде: 6 мыңға жуық есептегі азамат тексеріліп, 1 511 бұзушылықтың жолы кесілді.
«Іс-шараның жеке бағыты — кәмелетке толмағандар арасындағы құқық бұзушылықтың алдын алу. Рейдтер барысында полиция қызметкерлері түнгі уақытта кәмелетке толмағандардың ересектердің сүйемелдеуінсіз жүргенінің 3 883 фактісін анықтады. 396 жасөспірім кәмелетке толмағандарды бейімдеу орталықтарына орналастырылды. Мысалы, Алматы қаласында полиция қызметкерлері кәмелетке толмаған адамның кафеде заңда белгіленген шектеулерді бұзып отырғанын анықтады. Орын иесіне қатысты ҚР ӘҚБтК-нің 132-бабының 2-бөлігі бойынша әкімшілік іс қозғалды. Сонымен қатар кафенің қызметі 10 тәулікке тоқтатылды», — деп қосты ІІМ-де.
Жедел-профилактикалық іс-шара 5 қарашаға дейін жалғасатыны белгілі болды.
ІІМ жұмыстың тағы бір маңызды бағыты — қылмыскерлерді іздестіру және хабар-ошарсыз кеткен азаматтардың орнын анықтау екенін атап өтті.
«2026 жылдың тоғыз айында полиция қызметкерлері хабар-ошарсыз кеткендер қатарында тұрған 17 мыңнан астам адамның орнын анықтады. Сонымен қатар Қазақстанның құқық қорғау органдары іздестіріп жатқан 1 031 күдікті ұсталды. Олардың қатарында Астанада ұсталған 67 жастағы ер адам бар. Ол алаяқтық жасады деген күдікпен іздестірілген. Іс материалдары бойынша, ол 2018 жылы Қарағандыда сату деген сылтаумен коммерциялық ұйымның қоймасынан құны 401 млн теңгеден асатын тауарды алып кеткен», — деп нақтылады ведомствода.
Іздестіру жұмыстары басқа мемлекеттердің құқық қорғау органдарынан жасырынып жүрген адамдарға қатысты да жүргізілуде. Осылайша, Қазақстан аумағында ТМД және алыс шетел елдері іздестіріп жатқан 537 адам ұсталды. Осындай жағдайлардың бірі Алматыда тіркелді: полицейлер 1,3 млрд теңгеден астам сомаға алаяқтық жасады деген күдікті 45 жастағы шетелдікті ұстады. Ол 2023 жылы Бішкекте Оңтүстік Кореядан косметикалық өнімдерді жеткізуді ұйымдастыру деген сылтаумен жәбірленушінің ақшасын иемденген.