Қазақстан Ішкі істер министрлігі ресми Telegram-арнасында ел аумағында жүрген шетелдік азаматтарға, оларды қабылдаушы тұлғаларға және жұмыс берушілерге көші-қон заңнамасының нормаларын қатаң сақтау қажеттігін ескертіп, үндеу жариялады, деп хабарлайды infohub.kz сайты.
Үндеуде полиция көші-қон қызметін хабардар етудің белгіленген тәртібін сақтау қажеттігін еске салды. Атап айтқанда, шетелдіктер Қазақстанға келгеннен кейін үш жұмыс күні ішінде хабарлама жіберуі тиіс.
Сонымен қатар шетелдік азаматтар елде болу мерзімін, визаның және тиісті рұқсат құжаттарының қолданылуын қадағалауға, тіркелу кезінде көрсетілген мекенжайда тұруға, еңбек қызметін заңнама талаптарына сай жүргізуге және паспорттың қолданылу мерзімін бақылауға міндетті.
Жекелеген ұсынымдар Қазақстан азаматтарына, ең алдымен жұмыс берушілерге арналған. ІІМ-нің мәлімдеуінше, шетелдік азаматты жұмысқа қабылдаған жағдайда көші-қон қызметін үш жұмыс күні ішінде хабардар ету қажет. Тиісті рұқсатсыз шетелдік жұмыс күшін тартуға болмайды.
Сондай-ақ жұмыс берушілер еңбек шартының тоқтатылғаны немесе шетелдік азаматтың елден кеткені туралы көші-қон қызметін уақтылы хабардар етуге міндетті. Заңнама талаптарын бұзғаны үшін жауапкершілік қарастырылған, деп атап өтті министрлікте.
Полиция баршаны көші-қон заңнамасының талаптарын сақтауға, құқықтық тәртіпті нығайтуға және қоғамдық қауіпсіздікті қамтамасыз етуге жәрдемдесуге шақырды.