Қазақстан Ішкі істер министрлігі азаматтарға алаяқтық SMS-хабарламалар таратылып жатқаны туралы ескертті. Бұл хабарламаларда абитуриенттерге ІІМ-нің ведомстволық оқу орындарына қабылданғаны туралы жалған ақпарат беріледі, деп хабарлайды infohub.kz сайты.
Министрлік бұл хабарламалардың ведомствоға қатысы жоқ және жалған екенін мәлімдеді. ІІМ жоғары оқу орындарына қабылдау науқаны әлі аяқталмаған: конкурстық іріктеудің барлық кезеңдері жалғасуда, ал құжаттарды қабылдау белгіленген мерзімде — 15-25 шілде аралығында жүзеге асырылуда.
Қорытынды нәтижелер барлық кезеңдер аяқталып, қабылдау комиссиялары шешім қабылдағаннан кейін ғана белгілі болады. Абитуриенттер оларды тек Qyzmet police ақпараттық жүйесіндегі жеке кабинет арқылы біле алады.
ІІМ Qyzmet police жүйесі қабылдау туралы SMS-хабарламалар жібермейтінін ерекше атап өтті. Ведомство мұндай хабарламаларға сенбеуге, олардағы сілтемелерге өтпеуге, жеке деректерді үшінші тұлғаларға бермеуге және тек ресми ақпарат көздерін пайдалануға шақырады.