2026 жылдың бірінші жартыжылдығында Өзбекстаннан Қазақстанға тұрақты тұруға келген иммигранттар саны өткен жылдың сәйкес кезеңімен салыстырғанда екі есеге азайып, 2 894 адамды құрады, деп хабарлайды infohub.kz сайты.
Бұл соңғы бес жылдағы бірінші жартыжылдықтағы ең төменгі көрсеткіш. Ресми статистикада иммигранттарға тұрақты тұру елін ауыстырып, Қазақстанда тұру орны бойынша тіркелген шетелдіктер мен азаматтығы жоқ адамдар жатқызылады.
Алдыңғы жылдары бұл көрсеткіш біркелкі өзгерген жоқ. 2022 жылдың қаңтар-маусымында Өзбекстаннан келгендер саны жылдық мәнде 132%-ға, 2024 жылы 51%-ға, ал 2025 жылдың бірінші жартыжылдығында тағы 18%-ға өскен.
Нәтижесінде, соңғы төрт жылда бірінші жартыжылдықтағы Өзбекстаннан келген иммигранттар саны 3 мың адамнан асып отырған. Қазір көрсеткіш 2022 жылға дейінгі деңгейге жақындады.
DATA HUB деректеріне сәйкес, қаңтар-маусымда Өзбекстаннан келгендердің 69%-ы қазақтар. Олар көбінесе Алматы және Маңғыстау облыстарын таңдаған — 60% осы аймақтарға тиесілі. Тағы 18% иммигрант Алматы мен Астанада қоныстанған.
Келгендер санының азаюына қарамастан, Қазақстан мен Өзбекстан арасындағы көші-қон сальдосы оң болып қалуда. Себебі Қазақстаннан Өзбекстанға тұрақты тұруға кететіндердің саны шамалы.
Бұған дейін «Курсив» ІІМ шетелдіктер мен азаматтығы жоқ адамдар үшін Қазақстанға кіруге ақылы электронды рұқсат енгізуді ұсынғанын жазған. Жүйені 2026 жылдың тамызынан желтоқсанына дейін кезең-кезеңімен енгізу жоспарлануда, ал қаулы жобасы 17 тамызға дейін қоғамдық талқылауда болады.