Үндістанның Ассам штатындағы қатты мусондық жаңбырдан 40-тан астам адам қаза тауып, жүздеген мың адам зардап шекті. Синоптиктер жаңа нөсер жаңбырларды ескертіп отыр, деп хабарлайды infohub.kz.
Жергілікті биліктің мәліметінше, табиғи апаттан 41 адам көз жұмды. Су тасқыны 11 округте 653 мыңнан астам тұрғынды қамтыды. Эвакуацияланғандар үшін жүздеген уақытша орналастыру пункттері ашылып, онда адамдар қажетті көмек алуда. Құтқару жұмыстарына әскер, әуе күштері және төтенше қызметтер жұмылдырылды. Қиындыққа ұшыраған елді мекендерге гуманитарлық көмек жеткізу үшін ұшқышсыз ұшақтар пайдаланылуда.
Ассам бас министрі Химанта Бисва Сарманың айтуынша, жауын-шашын климаттық нормадан 436% асып, бұрын-соңды мұндай апатты көрмеген аудандарды су басқан. «Біз 41 қымбат өмірден айырылдық, мыңдаған мал суға кетті. Өзендердің жоғарғы ағысындағы нөсер мен нормадан 436% артық жауын-шашын қазіргі тарихта мұндай апатты көрмеген ауылдарды су басуға әкелді», — деп жазды Сарма.
Үндістан метеорология департаменті (IMD) жаңа ескерту шығарды: алдағы күндері Гуджарат, Махараштра, Раджастхан, Мадхья-Прадеш штаттары мен солтүстік-шығыс аймақтарда күшті және өте күшті жаңбыр күтіледі. «Үндістанның көп бөлігінде мусондық белсенділік кем дегенде бір апта бойы сақталады. Бірқатар штаттарда күшті және өте күшті жауын-шашын, ал кейбір аудандарда төтенше күшті нөсер болжанып отыр», — делінген болжамда. Синоптиктер сондай-ақ кенеттен болатын су тасқыны, көшкін, жолдардың су астында қалуы және көлік қозғалысының үзілу қаупі туралы ескертті. Балықшыларға Үндістанның батыс жағалауындағы бірқатар аудандарда қатты жел мен толқыннан теңізге шықпау ұсынылды.