Индонезияның 17 жастағы тұрғыны Рудиянса Борнео аралындағы орман өрттерін сөндіруге көмектесіп, өртпен Супермен костюмімен күреседі. Жас суперқаһарманның бейнежазбалары әлеуметтік желілерде миллиондаған көрілім жинады, деп хабарлайды infohub.kz.
Рудиянса әкесі ұйымдастырған ерікті өрт сөндіру тобына қосылды. Бір күні жасөспірім әкесінің өрт сөндіруге дайындалып жатқанын көріп, онымен бірге баруды ұйғарды. Енді олар бірге Палангкарай аймағындағы түтіндеген батпақтар мен жанған өсімдіктер арасында жұмыс істейді. Жасөспірім шыққанда өзінің сүйікті суперқаһарманы Суперменнің костюмін киеді, дәл осы киімде ол әлеуметтік желілерге тараған бейнежазбаға түскен.
Рудиянсаның айтуынша, ол жергілікті тұрғындарға көмектескеніне қуанышты. Болашақта жасөспірім орман рейнджері болуды армандайды, ал қазір басқа өрт сөндірушілер мен еріктілерді өртпен күресті жалғастыруға шақырады.
Рудиянсаның жанған орманға шлангпен су бүркіп жатқан бейнежазбасы әлеуметтік желілерде тез тарап, миллиондаған көрілім жинады. Тіпті Индонезияның орман шаруашылығы министрі жасөспірімге назар аударып, оны «Орман қаһарманы» деп атады.
Жігіттің әкесінің айтуынша, биылғы маусым топ құрылған 2020 жылдан бергі ең ауыр маусым болды. Әсіресе су мәселесі өткір тұр: қуаңшылыққа байланысты еріктілер пайдаланатын құдықтар мен басқа да су көздері тартылып қалды.
Қаңтардан шілдеге дейін Индонезиядағы өрт 200 мың гектардан астам жерді жойды. Бұл Джакарта аумағынан шамамен үш есе үлкен. Ел билігі өрттің таралуымен күресу үшін қосымша күш пен авиацияны жұмылдырды.
Түтін Индонезия Малайзия және Брунеймен бөлісетін Борнеоның бір бөлігін жауып тастады. Ал Эль-Ниньо құбылысына байланысты қуаңшылық жаңа өрттердің шығу қаупін арттырып, оларды тоқтатуға тырысқандардың жұмысын қиындатады.