Индонезиядағы Ява теңізінде бортында кемінде 240 адам болған жолаушы кемесі байланыстан шығып кетті. Экипаж сенбі күнінен бері хабарласпаған, деп жазады infohub.kz сайты.
Virgo Transport 8 кемесі Индонезияның Шығыс Ява провинциясындағы екінші үлкен қала Сурабаядан Борнео аралындағы Оңтүстік Калимантанға бет алған. Оңтүстік Калимантан провинциясының орталығы Банджармасиндегі іздеу-құтқару қызметінің дерегінше, кемеде байланыс ақауы болған.
Кеменің соңғы белгілі орны Ява теңізінде, Банджармасиндегі айлақтан шамамен 148 шақырым (92 миль) жерде тіркелген. Бортта 241 жолаушы болғаны нақтыланды. Қаза тапқандар туралы хабар түскен жоқ.
Билік өкілдері кеме операторы оқиғаны кеменің ауа райының қолайсыздығына тап болғаны туралы ақпарат алғаннан кейін хабарлағанын мәлімдеді.