inDrive халықаралық сервисінің негізін қалаушы Арсен Томский мен Камила Лукпанованың Стамбулдағы екі күндік тойын ұйымдастыру шамамен 470 млн теңгеге түскен. Босфор жағасындағы мерекеге 250-ге жуық қонақ жиналды, деп хабарлайды infohub.kz.
Түрік БАҚ-тың мәліметінше, жалпы шығын 50 млн түрік лирасын (шамамен 470 млн теңге) құраған. Оның шамамен 30 млн лирасы (шамамен 281 млн теңге) тек ойын-сауық шараларына жұмсалған. Тойға 15 елден 250-ге жуық адам келген, оның ішінде белгілі қазақстандық кәсіпкерлер мен миллиардерлер де бар. Мереке екі күнге созылып, үш түрлі шарадан тұрды.
Солардың қатарында неке рәсімі мен одан кейінгі үлкен кеш болды. Қонақтар сондай-ақ Босфор бұғазында серуендеді.
Кештің жүргізушісі Иван Ургант болса, басты музыкалық жұлдыз Валерий Меладзе болды — оның әндеріне келіншек қызу биледі. Жазда жұп Уральскіде — Лукпанованың туған жерінде үйлену рәсімдерін өткізген болатын. Стамбулдағы тойдан кейін Томский әлеуметтік желіде енді ресми түрде қазақ халқының күйеу баласы атанғанын жазды.
Жас жұбайлар кеш барысында бірнеше рет киім ауыстырды.
Тойға дайындық шамамен екі жарым айға созылды. Жұп Стамбулды кездейсоқ таңдамаған. Олардың айтуынша, бұл — олардың саяхаттауға ең жақсы көретін орындарының бірі.
«Біз бүгінгі күн тек біз үшін ғана емес, сол жерде болған барлық адам үшін де мереке болғанын қаладық», — деді Томский мен Лукпанова.
Бұған дейін Kursiv LifeStyle inDrive халықаралық сервисінің негізін қалаушы Арсен Томский Невададағы Блэк-Рок шөлінде өтетін Burning Man фестиваліне қазақтың қонақжайлылығын алып барғанын жазған еді. Кәсіпкер жұбайы Камила Лукпановамен және қазақстандық кемптің қатысушыларымен бірге үлкен партия бауырсақ пісіріп, фестивальдің жүздеген қонағына үлестірген.