Ұлттық экономика министрі Серік Жұманғарин үкімет отырысында елдің 2027-2029 жылдарға арналған әлеуметтік-экономикалық даму болжамын таныстырды, деп хабарлайды infohub.kz сайты.
ҰЭМ басшысы болжам әлемдік экономиканың даму перспективалары мен сыртқы нарықтардағы конъюнктураны ескере отырып жасалғанын атап өтті. Оның айтуынша, сыртқы қиындықтар сақталғанымен, Қазақстан экономикасы өсуін жалғастырады. Негізгі сценарий бойынша, 2027-2029 жылдары ЖІӨ-нің орташа жылдық нақты өсімі 5%-дан жоғары деңгейде болжануда. Номиналды ЖІӨ 2027 жылы 199,3 трлн теңгеден 2029 жылы 245 трлн теңгеге дейін өседі.
Экономиканың өсуі мұнай емес секторлардағы өндірістің ұлғаюымен қамтамасыз етіледі. Инфляцияның болжамды дәлізі 2027 жылы 7,5-9,5%, 2028-2029 жылдары 6-8% деңгейінде белгіленді. Макроболжамды ескере отырып, республикалық бюджеттің кірістері 2027 жылы 19,9 трлн теңгені, 2028 жылы 21,7 трлн теңгені, 2029 жылы 23,4 трлн теңгені құрайды деп күтілуде.
Мемлекеттік қаржының тұрақтылығын қамтамасыз ету үшін бюджет тапшылығы 2027 жылы ЖІӨ-ге шаққанда 2,3% деңгейінде белгіленіп, 2029 жылы ЖІӨ-нің 0,4%-ына дейін төмендейді. Мұнай емес тапшылық ЖІӨ-нің 5,3%-ынан 2,5%-ына дейін қысқарады, деп атап өтті Жұманғарин.