2026 жылдың шілдесінде Қазақстанда жылдық инфляция 10,2 пайызды құрады, бұл маусымдағы көрсеткіштен (10,3%) 0,1 пайыздық тармаққа төмен. Бір ай ішінде тұтыну бағалары 0,6 пайызға өсті, ал алдыңғы айда бұл көрсеткіш 0,8 пайыз болған еді, деп хабарлайды infohub.kz сайты.
Ұлттық статистика бюросының деректеріне сәйкес, баға өсімінің баяулауына ішінара көкөніс пен жеміс-жидектердің маусымдық арзандауы әсер етті. Атап айтқанда, қияр 22,6 пайызға, қызанақ 17,7 пайызға, сәбіз 5,3 пайызға, банан 4 пайызға, алма 2,7 пайызға, апельсин 2,3 пайызға, лимон мен картоп 1,6 пайызға арзандады. Сондай-ақ жұмыртқа (-1,4%) және арпа жармасы (-1,3%) бағасы төмендеді.
Шілде айында азық-түлік емес тауарлар арасында екінші қолдағы автокөліктер (-3,8%), электр еттартқыштар (-2,2%), кір сабын (-1,5%), смартфондар мен көзілдіріктер (әрқайсысы -1,3%), сондай-ақ шаш бояуы (-0,7%) арзандады.
Жылдық мәнде азық-түлік емес тауарлар 11,7 пайызға, азық-түлік өнімдері 10,1 пайызға, ақылы қызметтер 9,2 пайызға қымбаттады. Өткен жылдың шілдесімен салыстырғанда жекелеген көкөністер мен жемістердің бағасы айтарлықтай төмендеді: қияр 31,6 пайызға, қызанақ 26,5 пайызға, пияз 10,9 пайызға, сарымсақ 8,1 пайызға, апельсин 7,8 пайызға, алма 4,7 пайызға, күріш 4,1 пайызға арзандады.
Азық-түлік емес тауарлар арасында отандық құрастырылған автокөліктердің бағасы 16,2 пайызға төмендеп, ең көп арзандады. Сондай-ақ кондиционерлер (-10,8%), медициналық термометрлер (-7,5%) және бинттер (-6,4%) де арзандады.
Қазақстанда тұтыну бағаларының индексі ай сайын 537 тауар мен қызмет түрінің құнын бақылау негізінде есептеледі. 2026 жылдың қаңтарынан бастап инфляцияны есептеу құрылымында азық-түлік тауарларының үлесі 41,1 пайызды, азық-түлік емес тауарлардың үлесі 28,4 пайызды, ақылы қызметтердің үлесі 30,5 пайызды құрайды.
Бұған дейін «Курсив» Қазақстанда инфляция баяулауды жалғастырып жатқанын, алайда 2026 жылдың соңына қарай қайта жеделдеуі мүмкін екенін хабарлаған болатын. Мұндай болжам BCC Invest-тің 2026 жылдың екінші тоқсанының қорытындысы бойынша макроэкономикалық шолуында келтірілген.