Ипотекаға өтінім бермес бұрын көптеген қазақстандықтар банк несиені мақұлдай ма деген күмәнмен жүреді. Дегенмен, қаржы ұйымдары ескеретін негізгі критерийлерді білсеңіз, өз мүмкіндігіңізді өзіңіз бағалай аласыз. Оң шешім қабылдану ықтималдығын арттыру үшін неге назар аудару керектігін қарастырайық, деп хабарлайды infohub.kz сайты.
Ең алдымен сарапшылар несие тарихыңызды тексеруді ұсынады. Онда барлық қолданыстағы және өтелген несиелер, сондай-ақ мерзімі өткен қарыздар көрсетіледі. Егер ағымдағы қарыздар немесе мерзімі өткен төлемдер болса, алдымен оларды реттеген дұрыс, өйткені тіпті ескі қарыздар банк шешіміне әсер етуі мүмкін. Несие тарихының болмауы да кедергі болуы мүмкін, өйткені банкке клиенттің төлем қабілеттілігін бағалау қиынырақ.
Сондай-ақ несие жүктемесін ескеру маңызды. Банктер болашақ ипотекалық төлемді ғана емес, қазіргі міндеттемелерді де талдайды. Сондықтан ипотека рәсімдеу алдында тұтынушылық несиелер мен рассрочкаларды жапқан жөн. Ай сайынғы төлемдер неғұрлым аз болса, ипотекаға соғұрлым көп табыс қалады. Қазақстанда қарыз жүктемесінің рұқсат етілген коэффициенті 0,5 құрайтынын есте ұстаған жөн — бұл барлық несие төлемдері қарыз алушының табысының 50%-ынан аспауы керек дегенді білдіреді.
Банктер ресми табысты мұқият тексереді. Егер жалақының бір бөлігі ресми түрде төленбесе, ол ескерілмейді. Сондықтан өтінім бермес бұрын зейнетақы жарналарының нақты табыс деңгейіне сәйкес келетініне көз жеткізу керек. Бірнеше ресми жұмыс орны болса, қосымша табысты растау қажет. Сондай-ақ соңғы жұмыс орнындағы еңбек өтілі маңызды: әдетте кемінде алты ай қажет, ал зейнетақы жарналары үздіксіз болуы тиіс. Ипотека рәсімдеу алдында жұмысты күрт ауыстыру мақұлдану мүмкіндігін төмендетуі мүмкін.
Банкке жүгінбес бұрын мына аспектілерді де бағалаған жөн: қолда бар бастапқы жарна мөлшері; тұрақты төлеуге дайын ай сайынғы төлем сомасы; әртүрлі банктердің ипотекалық бағдарламалары бойынша пайыздық мөлшерлемелер; несиелеудің максималды мерзімі; қарыз алушыға және тұрғын үйдің өзіне қойылатын талаптар (салынған жылы, үй түрі, жағдайы, құжаттары). Егер сіз «Отбасы банкінен» несие алғыңыз келсе, қажетті бағалау көрсеткішін қалыптастыру үшін тұрғын үй депозитіне ақшаны алдын ала салыңыз. Ипотеканы рәсімдеуге кететін қосымша шығындарды да ұмытпаңыз.
Осылайша, өтінім бермес бұрын бастапқы жарнаңыздың, жақсы несие тарихыңыздың, жеткілікті ресми табысыңыздың, қолжетімді несие жүктемеңіздің және банк талаптарына сәйкес келетін тұрғын үйіңіздің бар екеніне көз жеткізіңіз. Осыдан кейін ғана ипотекаға сенімді түрде жүгіне аласыз. Бұған дейін сарапшы қазақстандықтардың ипотека рәсімдеу кезінде жіберетін бес жиі кездесетін қателігін атаған болатын — толық ақпарат біздің материалда.