Иран делдалдар арқылы Америка Құрама Штаттарына Ормуз бұғазын ашуға қатысты жаңа жеті күндік жоспарын ресми түрде жеткізді. Бастаманы Иран Ислам Республикасының Сыртқы істер министрі Аббас Аракчи жариялады, деп хабарлайды infohub.kz сайты.
«Қажетті шарттар орындалса, бұғаз қайта ашылып, қалыпты кеме қатынасы жеті күн ішінде қалпына келуі мүмкін», — деді ирандық сыртқы саяси ведомствоның басшысы.
Иран тарапының мәлімдемелеріне, сондай-ақ The Financial Times пен The Washington Post жарияланымдарына қарағанда, уақыт санағы Вашингтон ұсынылған меморандумды қабылдағаннан кейінгі күннен басталады.
Бұған дейін Иран американдық тарап бірқатар шартты орындаған жағдайда бұғазды жетінші күннің соңына қарай толық ашуға дайын екені хабарланған.
Олардың біріншісі — соғыс қимылдарын тоқтату: аймақтағы, соның ішінде Ливандағы белсенді әскери қимылдарды толық тоқтату.
Екіншісі — блокаданы алу: АҚШ тарапынан ирандық порттар мен танкерлерге салынған әскери-теңіз блокадасын тоқтату.
Үшіншісі — қаржылық жеңілдіктер: Иранның шетелдік банк активтерін, кемінде 12 миллиард доллар деп бағаланған қаражатын босату.
Төртіншісі — мұнай санкциялары: Иран мұнайын экспорттауға салынған американдық шектеулерді алып тастау.
Бұған дейін «Курсив» АҚШ президенті Дональд Трамп бейбіт келісімге қол жеткізілмесе, Иранды «жоятынын» ескерткенін жазған болатын.